Lækur

Lækur

Lækur er í Gljúfri og er gegnt innganginum þeim megin.

Beinn síminn inn á Læk er 441-5212

Litur Lækjar er rauður og er hann vinadeild Hlíðar.

Á Læk eru 12 börn, 10 fædd árið 2021 og 2 fædd árið 2022

Starfsfólkið á Læk

Ása Lind - Háskólamenntaður starfsmaður. Deildastjóri: asalind@kopavogur.is

Sara - Leiðbeinandi

Stefanía Arna - Leiðbeinandi

Aniela - Háskólamenntaður starfsmaður 

Vikan 9.-13.ágúst 2021

Vikan 20

Vika 18

Vikan 26.- 30.apríl 2021

Heil og sæl kæru foreldrar

Þá er síðasta vika þessa mánaðar að lokum komin. Vikan hefur verið góð og  margt hefur verið brallað bæði í leik, hópastarfi, samveru, útiveru, leikvangi og smiðju, alltaf fjör og gaman hjá okkur. Við höfum verið mikið úti, bæði f.h. og e.h. og notið veðurblíðunnar sem verið hefur. Á mánudaginn til að mynda borðuðum við síðdegishressinguna okkar úti, það fannst okkur þvílíkt spennandi og börnin voru alsæl í blíðunni. Við komum örugglega til með að gera þetta oftar næstu mánuðina og krossum fingur með veðrið😊

Samvera: Þessa vikuna höfum við lagt inn málhljóðið EI, ey, æft tákn hljóðsins, sungið vísuna og skoðað myndir í Lubba bókinni. Í næstu viku tökum við fyrir málhljóðið Ó ó.  Það er alltaf sama fjörið í samveru hvern dag, söngur og tónlist með hljóðfæri í hönd, hlustað á barnavísur, nafnalagið sungið hástöfum og farið yfir líkamsheiti, dansað og farið í hreyfileiki.

Blær: Við áttum góða umræðu um vináttu í morgun, fórum vel yfir hvað það er að vera góður vinur. Börnin fengu Blæinn sinn sem fékk mikla  ástúð og umhyggju frá eigundum sínum. Enduðum stundina með að syngja nokkra vinasöngva.

Rauði hópur: Farið var yfir Bínu bálreiðu reglurnar myndrænt, æfðum afstöðuhugtök: fyrir framan, aftan, upp á, inn í, við hliðina og fleira. Fórum yfir formin góðu og spiluðum bingó því tengdu. Teiknuðum og æfðum klippigripið okkar. Lásum bókina um hann Max sem fór á leikvöll til að leika. Hlutverkakrókur/frjáls leikur í lokin.

Guli hópur: Fór í könnunarleik, tóku nokkrar  dans og hreyfiæfingar. Skoðaðar voru bækur og mikið spjallað um myndirnar sem þar voru. Hópurinn æfði sig á stærðum og fengu verkefni því tengdu. Frjáls leikur í lokin með eldhúsdót og slæður.

Græni hópur:  Fór í könnunarleik, farið var yfir Bínu bálreiðu reglurnar. Hópurinn æfði sig í litum og formum, þau spiluðu bingó með formum. Bókin „Þrír kettlingar“ lesin fyrir hópinn. Frjáls leikur i lokin.

LEIKANGUR: Þessa  vikuna var boðið upp á skemmtilega þrautabraut og fengu börnin að hlaupa frjálst um svæðið. 

SMIÐJA: Á mánudaginn var kláruðu börnin hveitibatík myndirnar sínar. Falleg listaverk þar á ferð.

Í næstu viku verður heilsuvika í leikskólanum.  Við á Læk ætlum að leggja mikla áherslu á hreyfingu jafnt inni sem úti. Farið verður í vettvangsferðir, kíkt á ærslabelginn sem er í okkar nánasta nærumhverfi. Ætlum svo að enda vikuna á stöðvastuði þar sem settar verða upp spennandi leikstöðvar á yngri gangi. Ef veðrið verður okkur hliðhollt þá færum við stöðvastuðið út. Þriðjudaginn 4.maí ætlum við hafa ávaxtadag sem þýðir að börnin mega taka með sér ávexti eða grænmeti með sér í leikskólann. 

Takk fyrir vikuna og eigið góða helgi.

Kveðja frá okkur á Læk😊

Vika 16

Vikan 12.-16.apríl

Heil og sæl kæru foreldrar

Flott vika að klárast á Læk. Eins og alltaf höfum við haft í nægu að snúast. Við höfum átt góðar stundir í öllu daglegu starfi leikskólans, við höfum leikið, lesið, sungið, dansað, hlustað á tónlist, farið í hópastarf, unnið með sköpun og hreyfingu og margt fleira. 

Veðrið lék aldeilis við okkur fyrstu daga vikunnar, nánast sumarveður og nutum við þess í botn að getað hlaupið út á peysunni einni saman. Upp rann svo fimmtudagurinn með rigningu og roki, það gerði lítið til því við nutum góðs leiks inni með vinum okkar. Í morgun fóru við öll út, yngsti hópurinn lék sér í litla garði meðan þau eldri fóru í vettvangsferð og týndu rusl við leikskólann okkar.

Samvera: Þessa vikuna höfum við lagt inn málhljóðið Ð ð, æft tákn hljóðsins, sungið vísuna og skoðað myndir í Lubba bókinni. Í næstu viku tökum fyrir Æ æ. Við höfum verið dugleg að æfa nýju söngvana okkar og eru börnin farin að taka undir.

Blær bangsi:  Alla daga leggjum við áherslu á að kenna börnunum okkar að vera góður félagi og sýna vináttu, virðingu og hugrekki og áttum við góða Blæ stund í dag sem endra nær. Börnin knúsuðu Blæinn sinn, en hann fær mikla ást og umhyggju frá þeim. Stundina enduðum við svo á að nudda hvort annað við rólega vináttu tónlist.

Rauði hópur: Fór yfir Bínu bálreiðu reglurnar, lesin var bókin „Hvernig passa á afa“ skemmtileg bók með stórum og litríkum myndum sem við skoðum fram og tilbaka. Skoðuðum tölur frá 1-10 og æfðum okkur saman í talningu. Púsluðum saman dýrapúsl þar sem börnin þurftu að finna og para saman dýr og afkvæmi t.d. hundur/hvolpur, Kú/kálfur og fl.

Guli hópur: Fór í könnunarleik og nutu þau sín vel og lengi í frábærum leik. Hópurinn æfði sig í að perla, frjáls leikur með slæðum, brúðum, böngsum og eldhúsdóti.

Græni hópur:  Átti góðan leik í könnunarleik, efniviðurinn gefur endalausa möguleika í að rannsaka og setja saman, alltaf jafn spennandi leikur. Farið var yfir Bínu bálreiðu reglurnar, hópurinn æfði sig í að lita og klippa. Farið var yfir grunn formin og leikið með þau. Frjáls leikur – eldhúsdót og slæður.

LEIKANGUR: Boðið var upp á þrautabraut, leiki og slökun í lokin.

SMIÐJA: Þessa vikuna fengu börnin að mála við málningatrönur, ótrúlega spennandi og skemmtilegt verkefni.

Vettvangsferð: Í morgun fór eldri hópur að týna rusl bakvið leikskólann, þar var mikið rusl, börnin voru mjög upptekinn við týnsluna. Við töluðum um að við þyrftum að vera dugleg að passa upp á umhverfið okkar og að ekki mætti henda rusli á jörðina, í ruslatunnuna skal það fara.

Við áttum flotta GAMAN SAMAN stund á yngri gangi rétt fyrir síðdegishressingu í dag. Sungin voru hinir ýmsu söngvar og höfðu allir sem einn gaman saman.

Takk fyrir vikuna og eigið góða helgi.

Kveðja frá okkur á Læk😊

Vika 13

Vikan 22.- 26.mars 2021

• Í næstu viku, Dymbilvikunni verða Lubbi og Blær í páskafríi, einnig verður ekkert hópastarf hjá okkur í þessari viku. Gott væri að fá að vita ef börnin ykkar verða í fríi þessa dagana upp á matarinnkaup og það magn sem þarf að elda í þeirri viku.
• Minni að lokum á alla póstana frá Erlu og Birnu

Vika 12

Vikan 15.- 19.mars 2021

Við höfum átt góða viku saman á Læk. Hópastarf, frjáls leikur, samvera, smiðja, leikvangur hefur verið á sínum stað og allir sem einn notið sín í leik og starfi. Veðrið hefur verið okkur gott síðustu dagana og höfum við átt góða útiveru með vinum okkar. Í gær og í dag höfum við leikið í stóra garði eftir síðdegishressingu, en framkvæmdir standa nú yfir í litla garði. Lækjarhópnum hefur heldur betur líkað það vel og horfum við á þetta sem góða æfingu/aðlögun að leika í kringum þau eldri og upplifa og læra á  umhverfið í stóra garði.

Samvera: Þessa vikuna höfum við lagt inn málhljóðið Á á, æft tákn hljóðsins, sungið vísuna og skoðað myndir í Lubba bókinni. Í næstu viku tökum við fyrir málhljóðið Þ þ. Í Blæ stundinni okkar í dag æfðum við okkur í að nudda hvort annað. Nuddið er leið til að skapa jákvæð tengsl á milli barnanna, efla einbeitingu og umburðarlyndi þeirra á milli. Nuddið getur einnig komið í veg fyrir að ágreiningur fái að þróast. Nuddið gekk vonum framar og þetta munum við vinna með og þjálfa þau í næstu vikurnar. 

Hópastarf þriðjudag

Rauði hópur: Farið varyfir Bínu reglurnar. Bókin „Vinátta“ var lesin fyrir hópinn og áttum við uppbyggilegar umræður. Lékum okkur með liti, börnin fengu spjöld og lítil dýr í ákveðnum litum og verkefnið var að sortera dýrin á litaspjöldin. Við höldum áfram að leggja inn forsetningar, fyrir framan, uppá, við hliðina, bak við og fl. Við æfðum okkur í að halda á skærum, það var pínu erfitt en við ætlum að vera dugleg að æfa okkur. Frjáls leikur í hlutverkakrók.

Guli hópur: Fór í könnunarleik. Börnin skemmtu sér vel við að lita Blæ bangsa, þau æfðu sig í að halda á skærum og spiluðu lottó spil. Bókin „Heimur barnsins og leikskólinn minn“ var lesin fyrir hópinn. Frjáls leikur með bolta.

Græni hópur: Farið var yfir Bínu bálreiðu reglurnar myndrænt. Hópurinn naut sín vel við leirsköpun og líkamsheiti voru lögð inn og skoðaðar myndir því tengdu. Frjáls leikur í lokin með eldhúsdót.

LEIKANGUR: Þessa vikuna bauð Kolla hópnum upp á skemmtilega þrautabraut sem reyndi vel á litlu kroppana.

SMIÐJA: Börnin teiknuðu með trélitum og nutu sín í botn, einnig léku þau sér með ljósaborð sem staðsett er í smiðju, boðið var upp á skemmtilegan efnivið sem sett var á ljósaborðið og úr varð spennandi leikur og skemmtilegt uppgötvunarnám.

Vettvangsferð: Við höfum verið fá þessa vikuna á Læknum vegna veikinda og fría, var því farið með allan Lækjarhópinn að þessu sinni í stutta en góða vettvangsferð í kringum okkar nánasta umhverfi, börnin fengu að hlaupa um á hlaupabrautinni og enduðum við ferðina okkar á því að hlusta á vindinn hvína í trjánum í kringum okkur. 

Takk fyrir vikuna og eigið góða helgi.

Bk. Inga Sif, Íris, Sara og Nanna.

Vika 11

Vikan 8. - 12.mars 2021

Við höfum átt dásamlega litaviku og var gaman að sjá barnahópinn í þeim litum sem tilheyrðu hverjum degi. Í tilefni vikunnar ákváðum við að ráðast í skemmtilegt verkefni með Lækjarhópnum, við útbjuggum regnboga með litríkum höndum barnanna. Fallegt listsköpunarverkefni sem við límdum upp á vegg inn í hvíldarherberginu okkar. Vikuna enduðum við svo á regnbogafjöri, opið var á milli deilda og völsuðu börnin á milli og nutu í botn í leik og gleði. Einnig höfum við átt notalegar og lærdómsríkar stundir í hópastarfi, samveru, fataherberginu, frjálsum leik, útiveru og öðrum stundum í leikskólastarfinu okkar þessa skemmtilegu viku.

Samvera: Þessa vikuna höfum við lagt inn málhljóðið Ö ö, æft tákn hljóðsins, sungið vísuna og skoðað myndir í Lubba bókinni. Í næstu viku tökum við fyrir málhljóðið Á á. Við áttum góða Blæ stund þar  sem við minntum okkur á hvernig er að vera góður vinur, minntum á hve gott er að gefa knús ef vinur á erfitt. 

Hópastarf þriðjudag

Rauði hópur: Farið varyfir Bínu reglurnar og Bína bálreiða myndalottóið spilað. Þessa vikuna voru tvær bækur lesnar fyrir hópinn, sú fyrsta „Emma og litli bróðir“og sú síðari „Uppáhaldsform Depils“. Hópurinn átti skemmtilega Numicon stund þar sem þau léku sér með Numicon form, kubbaspjöld og  skemmtileg skapalón með bílum og bátum og fl. Lögð voru inn stærðfræðihugtök og fékk hópurinn spennandi verkefni því tengdu, þar sem þau þurftu að setja rétta stærð af blýöntum í rétt hólf. Fórum yfir litina og lögðum inn forsetningar, fyrir framan, uppá, við hliðina, bak við og fl. Könnunarleikur og frjáls leikur í hlutverkakrók.

Guli hópur fór í könnunarleik. Hópnum var boðið upp á spennandi hreyfileik þar sem þau fengu að kasta hreyfitening og æfingar gerðar sem komu upp hverju sinni. Leikið var með tölur, form og liti. Farið var yfir Bínu bálreiðu reglurnar myndrænt og lesin bókin um Bínu bálreiðu.  Frjáls leikur í hlutverkakrók.

Græni hópur fór í könnunarleik, léku með liti, æfðu sig í teikna með trélitum. Farið var yfir Bínu bálreiðu reglurnar myndrænt. Bækurnar „Kát kríli 1,2,3“og „Ég er eins árs“ lesnar fyrir  hópinn. Frjáls leikur í hlutverkakrók.

LEIKANGUR: Kolla bauð þeim upp á þrautabraut og slökun í lokin.

SMIÐJA: Verkefni tengt páskunum – þessa vikuna byrjuðum við á að mála páskaunga. 

Vettvangsferð: Engin vettvangsferð var farinn vegna regnbogafjörsins okkar í morgun. Ferðin bíður betri tíma.

Takk fyrir vikuna og eigið góða helgi.

Bk. Inga Sif, Íris, Sara og Nanna.

Vika 9

Vikan 22.- 26.febrúar 2021

Þá er enn einn föstudagurinn runninn upp. Vikan hefur góð og við höfum notið vel í samveru, hópastarfi, frjálsum leik, útiveru, leikvangi og smiðju. Við erum búin að leika og læra mikið og eiga góðar samverustundir með vinum okkar. Við höfum notið veðurblíðunnar síðustu daga, margir dásamlegir dagar með leik og gleði.

Samvera: Þessa vikuna höfum við lagt inn málhljóðið T t, æft tákn hljóðsins, sungið vísuna og skoðað myndir í Lubba bókinni. Í næstu viku tökum við fyrir málhljóðið K k. Blær bangsi kom í heimsókn, við minntum okkur á hvað það er að vera góður vinur og höfðum tilfinningaspjöldin til hliðsjónar. Börnin gáfu böngsunum sínum innilegt knús og við sungum saman vináttulagið. Við höfum sungið, æft okkur í að telja, farið yfir hin ýmsu líkamsheiti, klappað nöfnin okkar í atkvæði, og dansað við góða tónlist.

Hópastarf þriðjudag

Rauði hópur: Las bókina „Í sveitinni“ við skoðuðum húsdýrin og sveitina sem iðaði af lífi. Tókum fram Numicon og lékum að þessu sinni með kubbaplötur og kubba. Skemmtileg æfing þar sem við lögðum áherslu á liti, talningu og mynsturgerð. Frjáls leikur í hlutverkakrók.

Guli hópur fór í könnunarleik og átti góðan og innihaldsríkan leik. Guli hópur fékk í fyrsta skiptið að leika með Numicon talnaformin og skemmtu sér vel við að pússla þeim á kubbaplötur. Lesin var bókin „Ég er tveggja ára“ og frjáls leikur í lokin með furðuföt og eldhúsdót.

Græni hópur skemmti sér vel í könnunarleik. Börnin fengu spjöld með fyrsta stafnum í nafninu sínu og léku með málhljóðið. Þau fengu að leika með form og tölur frá 1-10. Bína bálreiða var lesin fyrir hópinn. Frjáls leikur með kubba í lokin..

LEIKVANGUR: Boðið var upp á þrautabraut og slökun í lokin.

SMIÐJA: Verkefni þessa vikuna var tengt kúnni. Nanna sýndi þeim myndir af kúm, og hvað haldið þið börnin fengu meira að segja að „mjólka“ kú sem Nanna var búin að útbúa. Ótrúlega skemmtilegt og spennandi verkefni fyrir börnin að upplifa. 

Takk fyrir vikuna og eigið góða helgi.

Bk. Inga Sif, Íris, Sara og Nanna.

Vika 8

Vikan 15.- 18.febrúar 2021

Það er búið að vera í nægu að snúast hjá okkur á Læk, enda margir skemmtilegir dagar í þessari viku. Bolludagurinn með fiskibollum í hádeginu og dásemdarbollum með sultu, rjóma og súkkulaði í síðdegishressingu. Á sprengidaginn borðuðum við saltkjöt og baunir. Upp rann svo mest skemmtilegasti dagurinn á árinu ÖSKUDAGURINN.  Dagurinn byrjaði á rólegum nótum og nutum við þess að hafa það huggulegt við bókalestur og rólegan leik. Eftir morgunmat og ávaxtastund var boðið á ball inn á Læk þar sem tónlistin dunaði. Eftir gott ball lá leiðin inn á Laut og þar var horft á Hvolpasveitina með rúsínur í hönd. Eftir bíóið fengu börnin að ganga á milli deilda þar sem leikjastöðvum hafði verið komið fyrir og áttu börnin skemmtilegan leik með öllum á yngri gangi. Heimabökuð pítsa var í hádegismat og eftir góða hvíld var andlitsmálning í boði fyrir þá sem vildu. Frábær dagur í alla staði.

Einnig nutum við góðrar samveru í hópastarfi, samveru, frjálsum leik, útiveru, leikvangi og smiðju þessa vikuna.

Samvera: Þessa vikuna höfum við lagt inn málhljóðið P p, æft tákn hljóðsins, sungið vísuna og skoðað myndir í Lubba bókinni. Í næstu viku tökum við fyrir málhljóðið T t. Blær bangsi og vináttuverkefni tengt vináttu voru á sínum stað. Einnig höfum við notið tónlistar, sungið, dansað og trallað.

Hópastarf þriðjudag

Rauði hópur byrjaði hópastarfstímann í frjálsum leik í hlutverkakrók, en í þessum sjálfsprottna leik fer mikið nám fram. Eftir því sem leikurinn þróast fara börnin að ákveða sjálf leikinn, semja reglur sjálf og ákveða hvernig leikurinn þróast. Það verður gaman að fylgjast með þeirri þróun hjá þeim. Við byrjuðum lesa bókina um Barbapabba og hans fjölskyldu. Skemmtileg bók, við skoðum myndirnar saman og spjölluðum um það sem við sáum. Börnin fengu skemmtilegt stærðfræðiverkefni í hendurnar, við æfðum okkur á hugtökunum stór, minni, minnstur. Í lokin fengu þau að æfa sig að setja mismunandi stærðir af girnilegum ísum á þar til gerð spjöld.  

Guli hópur fór í könnunarleik, þau dunduðu þau sér vel, rannsökuðu, byggðu og gerðu allskyns tilraunir með efniviðinn. Börnin æfðu sig í að pússla, léku með liti og flokkun. 

Græni hópur fór í könnunarleik líkt og guli hópur og skemmtu sér vel með efniviðinn sem gefur þeim endalausa skemmtilega og spennandi möguleika. Börnin spiluðu lottóspil, æfðu sig í að sortera liti og léku sér með tölur frá 1-10. Hópurinn fékk að heyra fleiri sögur um Bínu bálreiðu.

LEIKVANGUR: Boðið var upp skemmtilega leiki og slökun í lokin.

SMIÐJA: Börnin fengu að sulla með vatni, en vatnsleikur örvar bæði líkamlegan og andlegan þroska barnanna. Það var mikil gleði og upplifun hjá litlu Lækjarmolunum okkar sem eru að uppgötva og læra svo margt. Næstu mánuðina í smiðju ætlar Nanna að vinna með þemað „HÚSDÝRIN“.

Vettvangsferð: Við fórum í  gönguferð með allan hópinn í morgun, gengum að Salaskóla og tilbaka. Margt spennandi var að sjá á þessari stuttu leið okkar, fyrst ber að nefna fuglinn vin okkar Krumma sem sveimaði yfir okkur, við sáum stórar gröfur við Lindarkirkju og fullt fullt af bílum og fólki sem var í göngu eins og við. 

Takk fyrir vikuna og eigið góða helgi.

Bk. Inga Sif, Íris, Sara og Nanna.

Vika 7

Vikan 8. - 12.febrúar 2021

Þá er ein önnur vikan á Læk á enda. Við höfum átt góða viku saman og notið þess að leika og læra saman í frjálsum leik, hópastarfi, samveru, smiðju, leikvangi og útiveru. Við  höfum heldur betur notið góða veðursins í útiverunni þessa vikuna, pínu kalt en ótrúlega hressandi. Svo kom snjórinn á miðvikudaginn og kyngdi honum niður heldur hressilega, alltaf gaman að fá snjó og skemmtu börnin sér vel í góðum leik á útisvæðinu okkar. Í gær fimmtudag ákváðum við að vera inni í hlýjunni vegna roks og mikillar bleytu í garðinum okkar og áttum góðan innidag í staðinn.

Samvera: Þessa vikuna höfum við lagt inn málhljóðið O o, æft tákn hljóðsins, sungið vísuna og skoðað myndir í Lubba bókinni. Í næstu viku tökum við fyrir málhljóðið P p. Blær bangsi kom í heimsókn og við héldum áfram að lesa upp úr bókinni „Lífið í leikskóla“. Börnin fengu litla Blæinn sinn og gáfu honum hlýju og ástúð. Þennan föstudaginn fékk hann gott líkamsnudd, við nudduðum magann, höfuðið, andlitið, hendur og fætur og í lokin sungum við „Bangsi lúrir“ og svæfðum alla bangsana. Fuglinn Krummi er okkur mikið hjartans mál þessa  dagana, við fylgjumst grannt með ferðum hans þegar hann sveimar yfir okkur í útiverunni. Þá þenjum við raddböndinn og syngjum fyrir hann „Krummi krúnkar úti“. Við erum dugleg að telja upp í 10 og börnin eru orðin ótrúlega flink að klappa nöfn og orð í samstöfur/atkvæði. Að klappa í samstöfur/atkvæði er eimitt einn þáttur í að efla hljóðkerfisvitund barnanna.

Hópastarf þriðju- og miðvikudaga:

Rauði hópur átti góðan könnunarleik og það er gaman að fylgjast með þeim gera allskyns uppgötvanir með leikefnið sem þessi leikur býður upp á. Leikurinn verður þróaðri með hverri vikunni og eru þau farin að sameina efniviðinn með vinum sínum og farin að leika meira saman. Við fórum í litabingó, æfðum okkur í grunnlitunum sem og æfðum okkur í að vera þolinmóð og bíða eftir að röðin kæmi að okkur. Við lásum bókina „Þriggja ára“ og skoðuðum myndirnar úr bókinni. Stærðfræði – börnin fengu að leika með Numicon stærðfræðikubba og æfðu sig í að pússla þeim á spjöld, einnig skoðuðum við kubbana vel og töldum m.a. götin í þeim. Frjáls leikur með einingakubba í lok hópastarfstímans. 

Guli hópur fór í könnunarleik og lék sér. Bókin „Hvernig líður þér“ var lesin og myndir skoðaðar, en við erum mjög upptekinn af tilfinningum. „Bína bálreiða“ fengu þau einnig að hlusta á en Bína er dugleg að kenna okkur hinar ýmsu félagslegar reglur. Hópurinn æfði sig í að sortera grunnlitina. Þau skoðuðu og æfðu sig á rím myndum sem hanga á veggnum okkar inná deild. Hópurinn fékk einnig innlögn í gegnum leik á tölum frá 1-10 og pússluðu skemmtileg púsl. Frjáls leikur dúkkukrók í lok hópastarfstímans.

Græni hópur átti einnig góðan könnunarleik. Hópurinn lék með litaslæður, hér var áhersla lögð á innlögn á grunnlitun í gleði og söng. Börnin æfðu sig í að sortera dýr eftir litum, þau léku með litaspjöld og æfðu sig í litabingó. Einnig voru formin tekinn fyrir og fengu börnin að leika með spjöld með grunnformunum á. Frjáls leikur í dúkkukrók í lok hópastarfs.

LEIKVANGUR: Boðið var upp þrautabraut og slökun.

SMIÐJA: Börnin útbjuggu bolluvendi fyrir bolludaginn. 

Við fórum með yngsta hópinn í vettvangsferð í morgun, tókum góðan hring í kringum leikskólann. Þegar í leikskólann var komið að nýju voru þau pínu þreytt, en við förum rólega af stað og bætum svo í smá saman.

Það er spennandi vika framundan: Bolludagur er á mánudaginn með fiskibollum í hádeginu og rjómabollum í síðdegishressingu. Boðið verður upp á saltkjöt og baunir á sprengidaginn og á öskudaginn verður náttfatadagur í leikskólanum. 

Takk fyrir vikuna og eigið góða helgi.

Bk. Inga Sif, Íris, Sara og Nanna.

Vika 6

Vikan 1. - 5.febrúar 2021

Þessi flotta vika var helguð tannvernd og höfum við lært mikið um góða tannhirðu og tannheilsu. Við hlustuðum á sögur og skoðuðum myndir þessu tengdu. Þetta skemmtilega þema unnum við markvisst í hópastarfi og samveru. Börnin æfðu sig m.a. í að tannbursta tanngóm og við ræddum um mikilvægi þess að tannbursta sig alltaf. Tanngómana og tannbursta fengum við að láni frá Tannlæknastofu Elfu Guðmundsdóttur sem staðsett er á Salvegi 2. Þökkum við henni vel fyrir.

Fimmtudagsmorgun fór Guli hópur í gönguferð með vinum sínum af Lautinni út í Salalaug með listaverk sem börnin útbjuggu í tilefni af degi leikskólans. Listasýningin í Salalaug byrjar formlega í dag og mun standa fram til föstudagsins 12.febrúar. Við hvetjum ykkur eindregið til að fara og skoða fallegu listaverkin með börnunum ykkar.

Samvera: Þessa vikuna höfum við lagt inn málhljóðið I Y, æft tákn hljóðsins, sungið vísuna og skoðað myndir í Lubba bókinni. Í næstu viku tökum við fyrir málhljóðið O o. Blær bangsi kom í heimsókn í morgun að venju og sagði okkur sögu um „Lífið í leikskóla“ en í þessari góðu bók eru tólf litlar rímvísur sem lýsa kunnuglegum aðstæðum í lífi ungra leikskólabarna. Við skoðuðum saman myndir af börnum í ýmsum aðstæðum, en ung börn geta fundið fyrir margskonar tilfinningum, bæði jákvæðum og neikvæðum. Oft  er stutt á milli gráts og gleði hjá börnunum enda eiga þau erfitt með að færa tilfinningar sínar í orð, en með hjálp tilfinningaspjalda sem við kennarar berum um hálsin hefur tilfinningaskilningur þeirra eflst og eiga þau auðveldara með að tjá sig við okkur ef eitthvað kemur upp á. Í lok samverunnar fengu þau Blæinn sinn í hendurnar og nutu tónlistar um vináttu.

Hópastarf þriðju- og miðvikudaga:

Rauði hópur æfðu sig í litunum, þau sorteruðu lituð dýr á þar til gerð litaspjöld. Við lásum bókin „Bína bálreiða fer í leikskóla“ en Bínu bækurnar byggja á langri reynslu á að styrkja boðskiptahæfni og efla málþroska  hjá ungum börnum. Tannheilsa - Ræddum um hvað er hollt og hvað er óhollt fyrir tennurnar, höfðum uppi myndir sem þau gátu skoðað að vild. Við horfðum á myndband um tannburstun og börnin æfðu sig að tannbursta tennur/tanngóm og nota tannþráð. Einnig horfðum við á þá villinga „Karíus og Baktus“ þeir voru pínu skrítnir, en  vöktu mikla kátínu hjá hópnum. Einnig fengu þau að lita óhreinindi á stórar tennur og tannburstuðu svo óhreinindin af, það fannst þeim skemmtilegt. En mest spennandi var að skoða þessa litlu bræður með stækkunargleri, þvílíka sportið sem það var.

Guli hópur fór í könnunarleik og dunduðu sér vel og lengi með flotta efniviðinn. Þau fengu að leika frjálst með litaðar slæður sem þau settu yfir sig og nutu sín í leik og gleði. Leikur með kubba, hreyfiæfingar og fleira skemmtilegt var boðið upp á. Tannheilsa - hópurinn skoðaði myndir af tönnum, tannlæknum, tannkremi og tannburstum. Þau fengu eins og rauði hópur að æfa sig í að tannbursta og nota tannþráð á tennur/tanngóm, og lita óhreinindi á tennur og tannbursta óhreinindin í burtu. 

Græni hópur átti einnig góðan könnunarleik. Þessa vikuna voru bækurnar „Lúlli kann að telja“ og „Leikskólinn minn“ lesin fyrir hópinn. Börnin fengu að leika með liti og æfðu sig í að sortera. Tannheilsa – hópurinn skoðaði myndir af tönnum, tannlæknum, tannkremi og tannburstum. Eins og hinir tveir hóparnir þá æfðu þau sig í tannburstun og skoðuðu tannþráðinn gaumgæfilega. Þau voru ótrúlega dugleg að tannbursta burt óhreinindin af stórum hvítu tönnunum, mjög skemmtilegt verkefni.

LEIKVANGUR: Boðið var upp á frjálsan leik með dýnur, bolta og fleira.

SMIÐJA: Smiðja féll niður þessa vikuna.

Dagur leikskólans: Í tilefni af degi leikskólans þann 6.febrúar var boðið upp á „opið flæði“ í morgun, nóg var í boði og fengu börnin að valsa um á milli deilda og nutu þess sem þar var  í boði.

Lækur bauð vinum sínum á yngri gangi í danspartý eftir síðdegishressingu. Börn og starfsfólk skemmtu sér konunglega.

Takk fyrir vikuna og eigið góða helgi.

Bk. Inga Sif, Íris, Sara og Nanna.

Vika 5

Vikan 25.- 29.janúar 2021

Við höfum átt góðar, spennandi, skemmtilegar, uppbyggjandi og lærdómsríkar leikskólastundir þessa vikuna. Alltaf gaman og nóg um að vera hjá okkur, hópurinn sýnir mikla gleði í öllu því sem við réttum að þeim. Þau eru fróðleiksfús, forvitinn og alltaf til í tuskið.

Næsta vika verður helguð tannvernd en Embætti landlæknis og Tannlæknafélag Íslands standa fyrir tannverndarviku ár hvert. Hægt er að finna upplýsingar um tannhirðu barna inni á heimasíðu Embætti landlæknis, undir heilsa og líðan/tannvernd. Við á Læk ætlum að nota vikuna í almenna fræðslu í gegnum myndir, sögur og söng.  

Samvera: Þessa vikuna höfum við lagt inn málhljóðið S s, æft tákn hljóðsins, sungið vísuna og skoðað myndir í Lubba bókinni. Í næstu viku tökum við fyrir málhljóðið I i og Y y. Við syngjum mikið í samverunni okkar og tökum alltaf nokkur dansspor fyrir hádegismat. Ekki má gleyma okkar sameiginlegri talningu frá 1-10 og nafnakalli þar sem við klöppum nöfnin okkar í atkvæði. Þessa vikuna sem og síðustu vikur höfum við verið upptekinn af vináttu, tölum mikið um hvað það er að vera góður vinur. Blær bangsi kom í heimsókn í morgun og tók létt spjall við börnin en þau taka þessa stund mjög alvarlega og eru ein augu og eyru þegar hann tekur til máls. Gildin sem Blær stendur fyrir fléttum við inn í allt okkar starf til að stuðla að jákvæðu og öruggu umhverfi fyrir þau að lifa og hrærast í. En leikskólaheimurinn er jú pínu stór og margt sem þarf að lærast og taka inn til að geta átt í góðum og jákvæðum samskiptum við alla sem þar eru.

Hópastarf þriðju- og miðvikudaga:

Rauði hópur fór í könnunarleik og naut  sín vel á sínum svæðum í frábærum leik. Við lékum okkur með tölutáknin 1-10 og skoðuðum talnaspjöld með jafnmörgum hlutum og talan sagði til um, hugtök eins og stór-lítill, þungur-léttur og langur- stuttur lögðum við inn í gegnum eininga kubbaleik. Börnin fengu að æfa sig í í litunum og æfðu sig í að sortera persónur og dýr. Við æfðum okkur í grunnformunum með því að spila bingó/form það fannst börnunum mjög skemmtilegt. Æfðum okkur að ríma en við höfum límt á vegg rímmyndir sem  eru sýnileg börnunum alla daga. Lásum bókina „Sjáðu“ myndaversbók með skemmtilegum orðum og litríkum myndum, hún sló heldur betur í gegn og lásum við hana yfir tvisvar. Frjáls leikur í lokin/dúkkukrókur og leikur á dýnum í hvíldarherbergi.

Guli hópur naut sín vel í könnunarleiknum, leiknum ráða þau sjálf og eru þau farin uppgötva að hægt er að leika með efniviðinn á margan máta. Börnin æfðu sig í að pússla og perla sem eru góðar æfingar til að efla fínhreyfingar. Þau fengu að leika með form og liti og spiluðu skemmtilegt litaspil. Eins var leikið með lítil dýr sem þau sorteruðu síðan saman eftir litum með kennara sínum. Þessa vikuna var bókin „Ég er tveggja ára“lesin fyrir þau. Frjáls leikur í lokin með eldhúsdót og furðuföt.

Græni hópur fór í sinn könnunarleik og átti góðan leik með þennan skemmtilega efnivið. Þau fengu að skoða og leika með „Numicon kubba“.  Börnin pússluðu og efldu fínhreyfingarnar sínar í leiðinni, skoðuðu myndir í bók um litina og lögð voru inn ný orð/málörvun. Boðið var upp á leik með tölur frá 1-10. Þau lásu bókina um Pésa og Pippu „Nýi vinurinn“ og bókina „Ég er eins árs“ Frjáls leikur í lokin þar sem hópurinn fékk að leika með slæður í öllum regnbogans litum og spennandi skynörvunarleikföng.

LEIKVANGUR: Kolla bauð þeim í skemmtilega þrautabraut og slökun.

SMIÐJA: Smiðjan féll niður þessa vikuna.

Vettvangsferð: Farið var í vettvangsferð með hálfan hópinn í morgun. Við tókum þau elstu og fórum góðan hring í okkar nærumhverfi. Börnin voru ótrúlega dugleg í gönguferðinni, sýndu engin þreytumerki og blésu varla úr nös þegar í leikskólann var komið. Næsta föstudag fer yngri hópurinn í vettvangsferð.

Takk fyrir vikuna og eigið góða helgi.

Bk. Inga Sif, Íris, Sara og Nanna.

Vika 4

18.- 22.janúar

Þessi vika hefur verið okkur góð á Læk eins og allar hinar á undan. Það er alltaf nóg um að vera bæði leik og starfi. Smiðja, hópastarf, málörvunarhópar, leikvangur, frjáls leikur, samvera og útivera eru fastir liðir í okkar vikustarfi með börnunum. Við höfum það gott saman og allir eru að njóta sín. 

Við í Fífusölum fögnuðum Þorra með að halda Þorrablót í hádeginu og það voru sannir Lækjarvíkingar sem voru duglegir að smakka allt sem á boðstólum var, en hárkarlinn var ekki eins spennandi. 

Samvera: Þessa vikuna höfum við lagt inn málhljóðið F f, æft tákn hljóðsins, sungið vísuna og og skoðað myndir í Lubba bókinni. Í næstu viku tökum við fyrir málhljóðið S S.  Blæ stund áttum við í dag, spjölluðum um hvað er að vera góður vinur og enduðum á því að gefa Blæ gott líkamsnudd. Við syngjum alla daga, dönsum og hlustum á skemmtileg tónlist.

Hópastarf þriðju- og miðvikudaga:

Guli hópur fór í könnunarleik og átti góða stund í að leika með efniviðinn, skoða og gera allskyns tilraunir með hann. Form og litir, innlögn í gegnum leikinn, við nýttum okkur dupló kubba í grunnlitunum og form sem útbúin voru sérstaklega fyrir Lækjarhópinn. Bókin „Hvernig líður þér“ var lesin og myndir skoðaðar. Frjálsi leikurinn á sinn fasta sess í hópastarfi okkar, þar sem börnin fá að leika á og njóta sín í fámennum hópi.

Rauður hópur fór í könnunarleik og naut sín frábærlega í að leika, rannsaka og gera allskyns tilraunir á þessum skemmtilega verðlausa efniviði. Þau leika enn mikið í samhliðaleik en nú er farið að örla á tenglum á milli þeirra, þau eru farin að sýna hvort öðru og leikefni meiri áhuga. Það verður spennandi að fylgjast með þróun leiksins þeirra næstu vikurnar. Hópurinn fékk að leika með Numicon stærðfræðikubba, við byrjuðum á því að skoða formin og litina á kubbunum og síðan fengu þau hvert sitt spjald og pússluðu á sinn máta kubbunum á. Einnig lékum við okkur með skemmtilegt námsefni við innlögnina á grunnlitunum og formunum. Rauði hópur las þessa vikuna tvær bækur um þau Pésa og Pippu „Nýi vinurinn“ og „Rauða blaðran“ Eins og guli hópur þá áttum við góðan frjálsan leik í hlutverkakrók þar sem var í nægu að snúast.

Græni hópur fór eins og hinir tveir hóparnir í könnunarleik og áttu góðan leik í samveru við hvort annað. Þau fengu innlögn á grunnlitunum í gengum leikinn, einnig fengu börnin að skoða litina í skemmtilegri bók. Leikið var með tölustafi frá 1-10. Hópurinn fékk perlur og spjöld í hendurnar og æfðu fínhreyfingarnar sínar. Bókin „Snertu og finndu“ var lesin fyrir hópinn báða dagana. Þetta er skemmtileg bók með litríkum myndum og frábær til að þroska skynjun barnsins.

LEIKVANGUR: Kolla bauð þeim í skemmtilega þrautabraut og slökun.

SMIÐJA: Verkefni dagsins var að búa til víkingahjálma fyrir þorrablótið okkar. 

Vettvangsferð: Við fórum í okkar fyrstu vettvangsferð í morgun. Farið var í kringum leikskólann, gönguferðin tók tíma enda margar litlar lappirnar. Lítil skref verða að stórum skrefum með tímanum.

Við áttum „gaman saman“ stund  fyrir síðdegishressingu í dag með söng, gleði og gaman. Einnig fengu börnin að sjá myndir og hluti frá gamla tímanum í tilefni Þorrans.

Takk fyrir vikuna og eigið góða helgi.

Bk. Inga Sif, Íris, Sara og Nanna.

Vika 2

11.- 15.janúar 2021

Þessi vika hefur verið mjög góð á Læk, við höfum brallað margt og mikið. Skipulagt starf byrjað og allir sælir og ánægðir með sitt. Leikurinn er allsráðandi í gegnum daginn okkar, hvort sem það er í skipulögðu starfi eða öðru starfi leikskólans. Þessa vikuna höfum við verið upptekinn í leik með dupló, playmó, bíla, dýr, eldhúsdót, furðuföt og margt fleira. Eins höfum við leikið okkur með tússliti og spjöld sem gaman er að lita á.

Aðlögun nýju vinkonu okkar hefur gengið eins og í sögu, hún er alsæl og nýtur sín vel í okkar yndislega Lækjarhópi. Nú erum við orðin tólf, þrjú börn fædd 2018 og níu börn fædd 2019. 

Samvera: Nú æfum við okkur alla daga að telja saman upp í 10 og klappa nöfnin okkar í atkvæði áður en Lubbi kemur í heimsókn og fer yfir málhljóðin með okkur. En þessa vikuna höfum við lagt inn málhljóðið G g, æft tákn hljóðsins, sungið vísuna og og skoðað myndir í Lubba bókinni. Í næstu viku tökum fyrir málhljóðið Ff. Við höfum sungið, dansað og haft gaman saman. Blær bangsi kom í heimsókn í dag eftir langa fjarveru og fékk hann innilegt knús frá börnunum og að sjálfsögðu sungum við vinarlagið okkar „Við erum góð, góð hvort við annað“

Hópastarf: Við erum byrjaðar að vinna markvisst með orðaforða og málskilning barnanna í hópastarfi sem og í öllu okkar leikskólastarfi. Við höfum notið þess að lesa og skoða myndir í bókum, spilað og lagt inn liti og form í leiðinni, leikið með skemmtilega trékubba og æft okkur í að byggja saman. Börnin fengu að handfjatla skæri og æfðu sig í að klippa. Við ætlum að vera dugleg að efla fínhreyfingar barnanna, með því að æfa okkur með skæri sem og að byrja að þjálfa þau í réttu blýantsgripi. 

Eins áttum við góðar stundir í hlutverkakrók þar sem við efldum félagsfærni okkar í leiðinni, en hlutverkaleikur er frábær námsleið til að læra að eiga í góðum samskiptum, taka tillit, deila leikföngum og sýna hvort öðru samkennd.

LEIKVANGUR: Það var mikil gleði, ærsl og hlaup í leikvangi í gær, fimmtudag þar sem Kolla bauð þeim upp á spennandi þrautabraut, börnin nutu sín heldur betur í botn.

SMIÐJA: Það var skemmtilegt að fylgjast með 2019 börnunum fara í Smiðju í fyrsta skiptið á mánudaginn. Þau urðu skyndilega svo mikið fullorðinn þegar þau örkuðu af stað á vit ævintýranna með Nönnu. Allur barnahópurinn fór í smiðju og verkefni dagsins var að mála með vatnslitum.

Við áttum afmælisprinsessu þessa vikuna og bauð hún vinum sínum í ávaxtafagnað í tilefni afmælis síns. Innilegar hamingjuóskir með daginn elsku vinkona.

Frábær vika að baki og við hlökkum mikið til næstu.

Njótið helgarinnar.

Bk. Inga Sif, Íris, Sara og Nanna.

Vika 1 

5. -  8.janúar 2021

Kæru foreldrar J

Þá er fyrsta vikan á nýju ári senn á enda. Þetta hefur verið flott vika, skemmtileg og höfum við haft í nægu að snúast í leik og starfi. Það má með sanni segja að gleðin var mikil þegar hópurinn sameinaðist að nýju á þriðjudaginn var eftir gott jólafrí, dásamlegt að sjá þessa litlu vini hlaupa í kringum hvort annað með glettilegt bros á vör. Við höfum verið dugleg að leika og hefur sjálfsprottni leikurinn verið allsráðandi þar sem börnin stýra leiknum á sínum forsendum, sem er hinn fullkomni leikur 😊 Við höfum sungið mikið, trallað og dansað, og að sjálfsögðu kvöddum við jólin með jólasöng og dansi. 

Útivera hefur verið með mesta móti, pínukalt en dásamlegt útiveður fyrir börnin að njóta í góðum leik. 

Í næstu viku hefst skipulagt starf að nýju og erum við full tilhlökkunar að takast á við ný og spennandi verkefni með börnunum ykkar. Lubbi kemur úr jólafríi og við getum ekki beðið eftir því að fara að læra ný málhljóð og leika með þau í okkar daglega leikskólastarfi. Blær vinur okkar kemur einnig og ætlar að halda áfram að leiðbeina okkur hvernig við eigum að passa upp á hvort annað og vera góður félagi allra. Gildi þessa verkefnis höfum við að leiðarljósi eins og alltaf en þau eru: Umhyggja, virðing, umburðarlyndi og hugrekki. Félagsfærni barnanna eflist með hverjum deginum og þau verða duglegri og duglegri með hverri vikunni að eiga í jákvæðum samskiptum við hvort annað. 

Í hópastarfi næstu mánuðina ætlum við að vinna markvisst með málörvun, við ætlum að lesa bækur með því markmiði að efla tal, hlustun, málskilning og orðaforða barnanna. Við ætlum að efla og þjálfa hljóðkerfisvitund barnanna og byrjum á að æfa okkur að klappa nöfnin okkar og hluti í atkvæði og leika okkur með rím/myndir. Stærðfræði/hugtök, form, litir, mynstur ætlum við einnig að leika okkur með og ætlum við að æfa okkur að telja saman upp í 10 og erum við þegar byrjuð. Við ætlum að vinna með Numicon stærðfræðikubba, handfjatla þá og skoða og tengja þá við form, liti og tölur. 

LEIKVANGUR: Í gær fimmtudag fengu öll Lækjarbörn að fara í smá aðlögun til Kollu í Leikvang. En framvegis fara þau nú öll í Leikvang/ hreyfingu einu sinni í viku.  „Hér er markmiðið að efla alhliða þroska barnsins og líkamsvitund. En markviss hreyfiþjálfun hefur áhrif á málþroska og málskilning barna og þar með eykst félagsfærni og leikgleði sem eflir vináttubönd“ (Heilsustefnan). 

SMIÐJA: Frá og með næstu viku fara öll Lækjarbörn  í Smiðju til Nönnu og taka þátt í skemmtilegum og spennandi verkefnum í listsköpun og tilraunum. „Hér er lögð áhersla að börnin fái tækifæri til að prófa sig áfram með fjölbreyttan efnivið, geri tilraunir og þjálfi upp færni sem leiðir af sér að þau verði viss um eigin getu. Markmiðið er að viðhalda forvitni, sköpunargleði, efla sjálfstraust og ímyndunarafli barnanna“(Heilsustefna)

Fullt af nýjum áskorunum, upplifunum og ævintýrum í leik, námi og starfi framundan.(Sjá námsáætlun fyrir janúar og febrúar)

Ein lítil vinkona bætist í Lækjarhópinn okkar á mánudaginn og verður hún í aðlögun alla næstu viku. Við bjóðum hana hjartanlega velkomna til okkar og hlökkum mikið til að kynnast henni.

Við áttum afmælisprinsessu í dag sem bauð vinum sínum í afmælisfagnað í tilefni dagsins síns. Innilegar hamingjuóskir með daginn elsku vinkona okkar.

Þökkum fyrir þessa dásamlegu viku með gullmolunum ykkar.

Bk. Inga Sif, Íris, Sara og Nanna.

14. - 18.desember 2020

Þá er þessi dásamlega vika senn á enda, hún hefur verið róleg en viðburðarrík. Við höfum einblínt á að njóta líðandi stundar í leik og starfi með börnunum og hafa það gaman saman.

Í upphafi vikunnar var jólatréð sett upp og fengu börnin að hengja jólabjölluna sína sem þau föndruðu, á tréð á þriðjudaginn. 

Litlu jólin okkar gengu eins og í sögu þar sem allir sem einn með gleði í hjarta tók þátt í söng og dansi í kringum jólatréð. Jólamaturinn og ísinn slógu í gegn og borðuðu allir með bestu lyst. Í samveru þennan sama dag fengu þau jólapakka frá jólasveininum, sem var ekkert smá spennandi að fá 😊 Eftir síðdegishressingu fengum við heimsókn frá tveimur jólasveinum sem sprelluðu og sungu með börnunum í garðinum okkar.

Veðrið hefur heldur betur leikið við okkur þessa vikuna og höfum við notið þess að vera úti að leika með vinum okkar alla dagana. 

Í dag hittust við á yngri gangi til þess að kveikja á fjórða og síðasta kertinu sem ber heitið Englakertið. 

Leikvangur/Kolla 9:30-10:15 – 2018 árgangur: Þrautabraut, leikir og slökun.

Næsta vika verður stutt, ekkert skipulagt starf, bara leikur og gleði, huggulegheit, jólatónlist og útivera.

Takk fyrir frábæra og notalega viku.

Njótið helgarinnar.

Bk. Inga Sif, Íris, Sara, Nanna og Gerður.

7-11.desember 2020

Þessi vika hefur einkennst af miklum notalegheitum og hafa dagarnir verið mjög rólegir og afslappaðir. Við höfum skipt okkur mikið niður í litla hópa þar sem leikur og föndur fyrir jólin hafa verið allsráðandi. Samveran okkar hefur einkennst af jólatónlist og syngja börnin hástöfum og dilla sér í takt við músíkina. Við njótum þess að hlusta á fallega jólatónlist og höfum hana mikið í bakgrunni hvort sem það er leikur eða föndur í gangi. Börnin hafa verið mjög upptekinn af myndum tengdum jólunum sem við settum upp um daginn, og er mikið bent og spjallað um jólasveinana sem þar eru, piparkökurnar, matinn/hangikjötið og mömmu og pabba jólasveinana. 

Ekki má gleyma leiknum sem er rauði þráðurinn í gegnum leikskóladaginn okkar, en þessa vikuna höfum við leikið með einingakubba, holyblock kubba, dýr, bíla, playmó, dupló kubba, greiðukubba,furðuföt, eldhúsdót, pússlað, spilað, leirað, teiknað, hlustað á sögur, skoðað myndabækur, leikið í hlutverkakrók frammi á gangi svo fátt eitt sé nefnt.

Við höfum náð aðeins meiri útiveru þessa vikuna og höfum heldur betur notið þess í botn að komast út í ferska loftið eftir góðan dag í leikskólanum. Völlurinn hefur verið ansi háll suma dagana og ekki þorandi að fara út með börnin.

Yngri gangur átti notalega jólasamveru í dag, við kveiktum á þriðja aðventukertinu sem heitir Hirðakertið og sungum nokkur jólalög.

Í næstu viku verður jólatréð sett upp í matsal leikskólans og fá börnin okkar að taka þátt í að skreyta tréð með fallegu jólaskrauti sem þau hafa sjálf föndrað. Miðvikudaginn 16.desember verður jólaball og jólamatur með öllu tilheyrandi. Þennan sama dag eigum við von á óvæntum gestum sem ætla að koma og heimsækja okkur í útiveru um þrjú leytið, það verður spennandi 😊

Leikvangur/Kolla 9:30-10:15 – 2018 árgangur: Þrautabraut, leikir og slökun.

Smiðja/Nanna 8:45-9:15 – 2018 árgangur: Verkefni tengt jólum.

Takk fyrir góða viku og eigið góða helgi.

Bk. Inga Sif, Íris, Sara, Nanna og Gerður.

30.nóv - 4.des 2020

Kæru foreldrar 😊

Vikan hefur ljúf og góð fyrir alla, börnin hafa notið þess að vera í góðum leik með vinum sínum. Jólaundirbúningurinn er í fullum gangi, við höfum málað, föndrað, skreytt, hlustað og sungið jólalög. Það er góð stemning í loftinu og við höfum það svo huggulegt saman. Inni á deildinni okkar höfum við límt myndir af jólasveinum og ýmsu öðru sem tengist jólunum og sýna þau myndunum mikinn áhuga, þær eru skoðaðar fram og tilbaka, við setjum orð á það sem þau sjá/benda á og eflum þannig í leiðinni orðaforða þeirra og málskilning.

Veðrið hefur ekki verið okkur hliðhollt þessa vikuna, bæði hefur verið nístings kalt og vindasamt þannig að útivera barnanna hefur verið lítil þessa dagana. Þess í stað höfum við átt góðar stundir í leik, þar sem við höfum boðið börnunum upp á flæði á milli leikstöðva. Sköpum góðar og rólegar stundir þar sem börnin fá að njóta á sínum forsendum í leik með kennara sínum.

Yngri gangur átti notalega jólasamveru í dag, við kveiktum á Hirðakerti  og sungum jólalög.

Þriðjudagar - Leikvangur/Kolla 9:30-10:15 – 2018 árgangur: Þrautabraut, leikir og slökun.

Fimmtudagar - Smiðja/Nanna 8:45-9:15 – 2018 árgangur: Verkefni tengt jólum.

Takk  fyrir vikuna og eigið góða helgi.

Bk. Inga Sif, Íris, Sara og Nanna.

23.-27.nóvember 2020

Kæru foreldrar

Nú er uppáhaldstími margra að ganga í garð og erum við þegar byrjuð að undirbúa sitt lítið af hverju fyrir jólin. Til að mynda bökuðum við piparkökur á miðvikudaginn, sem var mikil upplifun fyrir börnin og fannst þeim mest spennandi að borða deigið, það var svo gott😊 Í síðdegishressingunni í gær fengum við svo að bragða á piparkökunum sem við bökuðum og drukkum með því heitt kakó.

Hópastarf: Þessa vikuna höfum við lagt inn málhljóðið L l, stafinn hans Lubba. Við æfðum tákn hljóðsins, sungum vísuna og skoðuðum myndir í Lubba bókinni. Allir hóparnir fóru í könnunarleik sem er alltaf jafn spennandi og hefur orðið mikil þróun í leik barnanna síðustu vikurnar og hlökkum mikið til að byrja að leika þennan leik á nýju ári. Við erum mjög upptekinn af því þessa dagana að telja upp í 10 og mörg farin að ná að telja með okkur. Ekki má gleyma frjálsa leiknum sem við njótum í lok hvers hópastarfstíma og hafa börnin leikið með bíla, eldhúsdót, furðuföt, kubba og fleira. Nú erum við komin í jólafrí frá skipulögðu starfi og njótum stundanna sem framundan eru.

Við höfum ekki verið eins mikið úti eins og við hefðum viljað en notið í staðin að vera í góðum leik inni.

Yngri gangur átti notalega jólasamveru í dag, við kveiktum á fyrsta aðventukertinu sem heitir spádómskertið og sungum nokkur vel valin jólalög.

Leikvangur – 2018 árgangur: Þrautabraut, leikir og slökun.

Smiðja – 2018 árgangur: Verkefni dagsins var að lita og skreyta lítið jólatré.

Takk fyrir góða viku og megið þið eiga ánæjulega aðventu.

Bk. Inga Sif, Íris, Sara og Nanna.

16.- 20.nóvember 2020

Kæru foreldrar

Þessi vika hefur gengið vel og hafa allir sem einn notið í leik og starfi. Við erum byrjuð að syngja jólasöngva, skreyta deildina og hlökkum mikið til komandi vikna með öllu því sem jóla undirbúningi fylgir. Miðvikudaginn 25. nóvember ætlum við að baka piparkökur og fylla leikskólann okkar af yndis piparköku lykt. Í síðdegishressingu, fimmtudaginn 26.nóvember bjóðum við svo börnunum upp á piparkökurnar sem þau bökuðu og heitt kakó. Því miður kæru foreldrar verður ekkert af foreldrakaffi sem hefð er fyrir vegna aðstæðna/sóttvarnartakmarkana.

Við byrjuðum mánudaginn með miklum krafti þar sem við fögnuðum afmæli leikskólans okkar. Börn og starfsfólk mættu í furðufötum/búningum og skemmtu sér konunglega við dans og söng á yngri gangi. Þennan dag átti Lubbi okkar einnig afmæli og að sjálfsögðu fékk hann afmælis söng frá börnunum. Eftir vel lukkað ball buðum við upp á flæði á milli deildanna sem börnunum fannst ótrúlega skemmtilegt og spennandi. Pizzaveisla í hádegismat og eplakaka með rjóma í síðdegishressingu var á boðstólum þennan afmælisdag.

Hópastarf: Þessa vikuna höfum við lagt inn málhljóðið U u. Við æfðum tákn hljóðsins, sungum vísuna og skoðuðum myndir í Lubba bókinni. Í næstu viku tökum við fyrir málhljóðið L l. 

Mánudaginn 30.nóvember ætlum við að taka okkur jólapásu frá hópastarfi, Lubbi og Blær fara einnig í pásu.

Eigið góða helgi kæru foreldrar og börn 😊

Bk. Inga Sif, Íris, Sara og Nanna.

Vikan 9.-13.nóvember 2020

Kæru foreldrar

Gleði og notalegheit, frjáls leikur, nám í leik og starfi, lestur, söngur/dans og útivera hefur einkennt þessa góðu viku sem senn er á enda. Nú hefur barnahópurinn og kennarar verið saman í nokkra mánuði og höfum við náð góðum tengslum. Börnin eru glöð og ánægð að koma í leikskólann og sýna mikla vellíðan og gleði í öllu starfi skólans. Við á Læk erum ótrúlega þakklát fyrir að fá að vera þátttakendur í leikskólalífi litlu gullmolana ykkar og sjá þau þroskast, vaxa og dafna með hverjum deginum.

Nú styttist heldur betur í jólin og erum við þegar byrjuð að huga að jólagjöfum sem litlir fingur koma til með að vinna að. Markmiðið okkar næstu vikurnar er að njóta tímans vel sem framundan er, hafa það skemmtilegt saman, hlusta á og syngja jólalög og gera spennandi verkefni sem tengjast jólunum.

Hópastarf: Þessa vikuna höfum við lagt inn málhljóðið E e. Við æfðum tákn hljóðsins, sungum vísuna og skoðuðum myndir í Lubba bókinni. Í næstu viku tökum við fyrir málhljóðið U u. Allir hóparnir fóru í könnunarleik og alltaf er það jafn spennandi og skemmtilegt að fá að fylgjast þeim og sjá hvað leikurinn þeirra þróast hratt. Börnin hafa verið fljót að læra á efniviðinn, hvað passar saman og ekki. Fá algjörlega að uppgötva á sínum forsendum án okkar hjálpar. Þau skoða, handfjatla, smakka, fylla og tæma en þau hafa verið mjög upptekinn af því þessa dagana að fylla og tæma plastflöskur/plastfötur með keðjubútum/töppum og fleiru. Skemmtilegast er þó að hrista þær og búa til hljóð. Markmiðið með þessari aðferð er einmitt að börnin uppgötvi hlutina og möguleika þeirra með snertingu, lykt, bragði, heyrn og sjón, en í þessum leik eru öll skilningarvitin örvuð sem og fín,- og grófhreyfingar.

Áfram höldum við að leggja inn í gegnum leikinn liti, form, málhljóð, tölur frá 1-5, orð og hugtök. Við höfum lesið og skemmt okkur yfir bókalestri þar sem við höfum markvisst unnið með að efla orðaforða og málskilning barnanna.

Í lok hvers hópastarfstíma tekur frjálsi leikurinn við, og höfum við þessa vikuna leikið með einingakubba og dýr, farið í hlutverkakrók frammi á gangi, leikið með leir, bíla, furðuföt, playmó og járnbrautarlestina og fleira.

Samverustund/Blæ stundir: Við höfum sungið mikið og trallað saman, höfum einblínt á hreyfisöngva síðustu vikurnar sem er mikið uppáhald hjá börnunum. Við áttum notalega Blæ stund eins og alla aðra föstudaga, börnin fengu í hendurnar Blæinn sinn sem var að sjálfsögðu knúsaður í bak og fyrir. Blærinn og tilfinningaspjöldin okkar hafa verið okkur mikilvægt verkfæri í að vinna með félagsfærni barnanna og höfum við séð miklar framfarir í samskiptum þeirra á milli.

Við áttum afmælisprins í dag sem bauð vinum sínum í veislu í tilefni dagsins síns. Takk innilega fyrir okkur. 

Á mánudaginn 16.nóvember verður fagnaður í tilefni afmælis Fífusala og dags íslenskrar tungu. Börnin mega mæta í furðufötum/búningum, og verður ball á ganginum kl.9:15. Boðið verður upp á pizzu í hádegismat og eplaköku með rjóma í síðdegishressingu. Hlökkum mikið til 😊

Fimmtudaginn 19.nóvember verður skipulagsdagur, leikskólinn verður lokaður þennan dag.

Eigið góða helgi kæru foreldrar og börn 😊

Bk. Inga Sif, Íris, Sara og Nanna.

Vikan 2.- 6.nóvember 2020

Kæru foreldrar

Þessi vika hefur heldur betur verið full af áskorunum bæði fyrir börn, foreldra og kennara. En með góðu samstarfi og samvinnu allra hefur allt gengið vel og allir tekið þeim breytingum sem orðið hafa vegna þessara undarlegu tíma með miklu jafnaðargeði. Einnig langar okkur að hrósa þessum dásemdar gullmolum ykkar hve vel þau hafa staðið sig síðustu daga og vikur í þessu öllu saman, það að vera nánast hent inn fyrir leikskóladyr, þar sem mamma og pabbi mega alls ekki stíga inn fæti og mæta svo kennurum sínum með grímu fyrir vitin í nánast öllu starfi skólans, það er nú ansi mikið að taka inn fyrir svona litla kroppa. En þau tækla þetta frábærlega.

Eins og þið hafið fengið upplýsingar um, þá hefur verið sett pása á leikvang og smiðju þessa og næstu tvær vikurnar. Fyrirhugað er að taka þráðinn upp að nýju miðvikudaginn 18.nóvember.

Þessa dagana er okkar markmið að halda hópastarfstímunum okkar og njóta saman í leik, starfi og námi. Útivera hefur verðið meiri en gengur og gerist, en það er alltaf jafn gaman að leika með góðum vinum í litla garðinum okkar. Nú höfum við fengið fleiri vini frá yngri gangi í garðinn okkar vegna þessara hertra sóttvarnaraðgerða. 

Hópastarf: Þessa vikuna höfum við lagt inn málhljóðið H h, en það er gaman að segja frá því að við eigum einmitt tvo gullmola sem eiga stafinn H h. Við æfðum tákn hljóðsins, sungum vísuna og skoðuðum myndir í Lubba bókinni okkar góðu. Í næstu viku tökum við fyrir málhljóðið E e. Við höfum leikið mikið í hópunum okkar, lesið bækur, leikið í hlutverkakrók frammi á gangi, farið í könnunarleik, leikið með leir, spilað, pússlað, leikið með einingakubba og viðarkubba/bíla og margt fleira.

Frjáls leikur á stóran sess í okkar starfi og þessa vikuna buðum við börnunum upp á leik með furðuföt, bíla, dupló, dýr, eldhúsdót og playmó.

Minni á að næsta vika er síðasta vikan í lestrarátakinu hans Lubba okkar 😊

Eigið góða helgi kæru foreldrar og börn 😊

Bk. Inga Sif, Íris, Sara og Nanna.

Vikan 26.- 30.október 2020

Kæru foreldrar 😊

Við Lækjargengið höfum átt góða viku saman í leik og gleði. Við höfum haft í nægu að snúast eins og alltaf. Á mánudaginn fór 2018 hópurinn okkar í sína fyrstu vettvangsferð með 2018 hópnum á Laut. Löbbuðum við að Salaskóla, lékum okkur þar í dágóða stund og löbbuðum svo tilbaka aftur. Vettvangsferðin gekk það vel að við höfum ákveðið að fara einu sinni í mánuði héðan af. Mun ég senda póst á ykkur 2018 foreldra þegar kemur að næstu vettvangsferð.

Hópastarf: Þessa vikuna höfum við lagt inn málhljóðið J j æft tákn hljóðsins, sungið vísuna og skoðað myndir í Lubba bókinni. Í næstu viku tökum við fyrir málhljóðið H h. Einnig höfum notið frjálsa leiksins í hópastarfi, þvílík gæðastund sem það er að leika í fámennum hóp, þar sem börnin fá að njóta sín í leik og leika á sínum forsendum, uppgötva og rannsaka á sínum hraða. Það er gaman að fylgjast með leiknum þeirra, en hann þróast með hverjum deginum sem og samskipti þeirra á milli. Könnunarleikur, hlutverkaleikur, einingakubbar, bókalestur, fínhreyfingar efldar, innlögn í gegnum leikinn: litir, form, málhljóð, félagsfærni og markviss málörvun var einnig á dagskrá í hópastarfinu okkar. 

Eins var gaman að leika þess á milli með furðufötin, bangsana, duplókubbana, playmó, dýrin, bílana, eldhúsdótið og fleira.

Blær bangsi heimsótti okkur í samveru í dag og fékk hann innilegt knús frá vinum sínum. Við leggjum mikla áherslu á að efla samskiptahæfni barnanna, og æfum við okkur á hverjum degi að koma vel fram við vini okkar. Vináttuverkefnið Blær bangsi er frábært verkfæri til að vinna með jákvæð samskipti, vinsemd og virðingu innan barnahópsins. Einnig nýtum við okkur tónlistina sem fylgir Blæ bangsa en hana er að finna á spotify undir heitinu Vinátta – Gott er að eiga vin, fyrir börn yngri en þriggja ára.

Listsköpun: Verkefni -  líkaminn minn – hendur og fætur barnanna. Klárum þetta skemmtilega verkefni í næstu viku. Fljótlega eftir það ætlum við að fara að koma okkur í jólagírinn og byrja á  spennandi verkefnum fyrir jólin.

Smiðja 2018 árgangur: Verkefni dagsins – leir og opin efniviður.

„Gaman saman“ var á yngri gangi í dag þar sem við sungum og trölluðum. Alltaf jafn gaman og koma saman og syngja og efla tengslin við vini okkar á yngri gangi.

Við áttum einn afmælisprins þessa vikuna, bauð hann okkur í ávaxtafagnað í tilefni afmælis síns. Þökkum við honum vel fyrir 😊

Takk fyrir frábæra viku eigið góða helgi 😊

Bk. Inga Sif, Íris, Sara og Nanna.

Vikan 19.- 23.október 2020

Kæru foreldrar 😊

Við höfum átt góðar stundir í leik og starfi og skemmt okkur vel saman. Þessa vikuna nutum við hópastarfs, Lubba stundar, Blæ stundar, listsköpunar, samveru, leikið, lesið, sungið og hlustað á tónlist, hreyft okkur í söng og í útiveru, leikið úti hvern eftirmiðdag, borðað góðan mat og hvílt okkur vel.

Hópastarf: Þessa vikuna höfum við lagt inn málhljóðið V v æft tákn hljóðsins, sungið vísuna og skoðað myndir í Lubba bókinni. Í næstu viku tökum við fyrir málhljóðið J j. Við höfum heldur betur tekið „Lestrarátak Lubba“ með trompi og stækkar Lubbafjallið okkar með hverjum deginum. Hlökkum mikið til að fá fleiri Lubba bein í næstu viku 😊Blær bangsi heimsótti okkur í samveru, börnin fengu sinn Blæ og töluðum við um hve gott er að eiga góðan vin og að við þyrftum að passa vel og vera góð hvort við annað. Í lok stundarinnar fékk Blær gott nudd frá vinum sínum, við nudduðum magann, höfuðið, eyrun, kinnarnar, lappirnar og hendurnar. Við vinnum alla daga markvisst að því að efla félagshæfni barnanna, æfum þau í að skiptast á og deila leikföngum og eiga í jákvæðum samskiptum við hvort annað. 

Við höldum áfram að leggja inn og leika með tölur, liti og form, við notum efni sem við höfum sjálfar búið til, til hliðsjónar við innlögnina. Fjölskylduhúsin eru alltaf jafn spennandi, sem er einnig frábær vettvangur til að efla orðaforða og hugtakaskilning barnanna. Þessa vikuna byrjuðum við að vinna með Numicon stærðfræðikubba, rauði hópur reið á vaðið og fékk að leika, handfjatla og skoða stærðfræðikubbana sem eru í mörgum litum, við byrjum rólega, leyfum þeim næstu mánuðina að handfjatla og rýna í kubbana og byrjum svo markvisst að leggja inn form kubbana og tölur haustið 2021. Við nutum frjáls leiks, hlutverkaleiks og könnunarleiks að venju með hópunum okkar.

Listsköpun: Í gær fimmtudag byrjuðum við að vinna myndverk þar sem þemað er líkaminn minn – einblínum á hendur og fætur barnanna. Þetta verkefni mun vara næstu tvær vikurnar.

Smiðja 2018 árgangur: Verkefni 1 – börnin máluðu á lok, band var svo bundið við lokið, aðalverkefnið var að þræða upp á bandið pasta og fleira. Frábær æfing fyrir fínhreyfingar og einbeitingu. Verkefni 2 - blað var sett í bakka, sett málning í annað hornið. Golfkúla var svo látin rúlla í málningunni fram og tilbaka í bakkanum, ótrúlega spennandi tilraun.

Leikvangur 2018 árgangur: Þrautabraut og leikir, slökun í lokin.  

Áttum skemmtilega „Gaman saman“ stund með yngri gangi í dag, sungum Lubba lögin góðu og tókum nokkur dansspor í lokin.

Mánudaginn 26.október ætlum við að halda bangsadaginn hátíðlegan, þá mega börnin koma með bangsa að heiman. Muna að merkja hann vel.

27.október er skipulagsdagur og verður leikskólinn lokaður. Dagskrá dagsins fenguð þið í pósti frá Birnu og Erlu í gær.

Takk fyrir frábæra viku og eigið góða helgi 😊

Bk. Inga Sif, Íris, Sara og Nanna.

Vikan 12.- 16.október 2020

Kæru foreldrar 😊

Dagarnir eru fljótir að líða þegar það er gaman og þessi vika hefur svo sannarlega flogið áfram.

Hópastarf: Þessa vikuna höfum við lagt inn málhljóðið Ú ú æft tákn hljóðsins, sungið vísuna og skoðað myndir í Lubba bókinni. Í næstu viku tökum við fyrir málhljóðið V v og höldum áfram að leika með hljóð fyrsta stafsins okkar og tákn. Við erum miklir lestrarhestar og nýtum hvert tækifæri í hópastarfi til að lesa saman og skoða myndir. Þessa vikuna lásum við og skoðuðum bækur um litina, farartæki, mat og húsdýr. Fjölskylduhúsin eru alltaf jafn vinsæl og fara börnin reglulega að sínu húsi og kíkja eftir sinni fjölskyldu, einnig eru fjölskylduhús vinanna mjög spennandi. Blær bangsi hefur kíkt á okkur og höfum við sýnt litla Blæ ástúð og vináttu. Tilfinningar vinnum við með alla daga, æfum börnin í að skilja og setja orð á tilfinningar sínar, hér styðjumst við mikið við tilfinningaspjöld og myndir. Þemað þennan mánuðinn er „Líkami minn“, við höfum lagt markvisst inn líkamsheiti þessa vikuna, sungið söngva því tengdu og hreyft okkur mikið.

Allir hóparnir fóru í könnunarleik og er ótrúlega gaman að fylgjast með litlu vísindamönnunum okkar. Í þessum leik fá börnin að upplifa efniviðinn og leika með hann á sínum eigin forsendum án afskiptar okkar, þau skoða efniviðinn, snerta, hlusta og smakka. Þau sýna mikla einbeitingu í sinni vinnu, leika og setja saman hluti á ólíkan hátt, þau fylla og tæma, stafla hlutum og svo lengi mætti telja og er sigurtilfinningin mikil hjá þeim þegar hlutirnir koma heim og saman. Smám saman læra þau að vinna saman og finna lausnir á hinum ýmsum vandamálum sem upp koma í leiknum. Við kennararnir tökum ekki þátt í leiknum, við erum á hliðarlínunni og skráum niður sem fram fer. Ótrúlega spennandi og verður gaman að fylgjast með og sjá þróunina í könnunarleiknum þeirra næstu vikurnar.

Smiðja 2018 árgangur: Verkefni dagsins, hljóðfæragerð og sjálfsmynd. Alltaf gaman í smiðju þar sem þau fá að fást við skemmtileg og spennandi viðfangsefni.

Leikvangur 2018 árgangur: Þrautabraut  og slökun í lokin. Í þessum tímum fá þau einnig æfingu í að fara eftir fyrirmælum, fara eftir ákveðnum leikreglum og standa í röð.

„Gaman saman“ við áttum yndisstund með „BLEIKUM“ vinum okkar á yngri gangi í dag. Við sungum saman nokkur lög og skemmtun okkur konunglega.

Það var spænskur dagur á mánudaginn. Nutum við þess að leika með spænska tónlist í bakrunni.

Góð vika með leik og gleði, hreyfingu, söng, myndsköpun, útiveru, dans, bókalestri, könnunarleik, hlutverkaleik, leik með einingakubba og fleira.

Hlökkum til nýrra ævintýra með gullmolunum ykkar.

Eigið góða helgi 😊

Bk. Inga Sif, Íris, Sara og Nanna.

Vikan 5.- 9.október 2020

Kæru foreldrar 😊

Þessa góðu viku tileinkuðum við heilsu og hreyfingu. Við höfum verið mjög dugleg að hreyfa okkur í útiveru þessa vikuna og fórum í okkar fyrstu vettvangsferð í gær fimmtudag. Við skiptum barnahópnum í tvennt og fórum með einn hóp í einu að nýja leiksvæðinu sem er við hlið leikskólans. Þar fengu börnin að hlaupa um og hoppa á ærslabelgnum góða. Þvílíka fjörið og skemmtu börn og kennarar sér  konunglega. Einnig tókum við inn í samveruna okkar skemmtilega hreyfisöngva og nutum þess að hreyfa okkur í takt við tónlistina, þessa söngva komum við til með að halda í okkar samveru næstu vikurnar. Enduðum við heilsuvikuna á frábærum hreyfidegi á yngri gangi, en á ganginum var búið að setja upp þrautabraut og hinar ýmsu stöðvar inn á deildum m.a. var boðið upp á dans, leik með fallhlíf, jafnvægisslá, leikið með hringi og boðið upp á andlitsmálningu.  Börnin fengu að hreyfa sig frjálst um svæðin og fengu að spreyta sig í leik og gleði.

Hópastarf: Þessa vikuna höfum við lagt inn málhljóðið Í í, æft tákn hljóðsins,sungið vísuna og skoðað myndir í Lubba bókinni. Í næstu viku tökum við fyrir málhljóðið Ú ú.  Á sama tíma höfum við lagt áherslu  á nöfn barnanna, fyrsta stafinn þeirra, málhljóð og tákn stafsins þeirra. Einnig höfum við lagt inn hugtök tengd stærðfræði, skoðuðum tölur og form, lásum bækur, fórum í könnunarleik, hlutverkaleik, pússluðum, byggðum úr einingakubbum og dupló kubbum.

Smiðja 2018 árgangur: Börnin unnu listaverk með vaxlitum og vatnslitum.

Leikvangur 2018 árgangur: Þrautabraut  og slökun í lokin. Í þessum tímum fá þau einnig æfingu í að fara eftir fyrirmælum, fara eftir ákveðnum leikreglum og standa í röð.

Við áttum dásemdar „Gaman saman“ stund með vinum okkar á Lind og Laut e.h. sungum og trölluðum.

Frábær vika með mikilli gleði, leik, hreyfingu, söng, listsköpun, vettvangsferð og notalegaheitum.

Hlökkum til nýrra ævintýra með gullmolunum ykkar í komandi viku.

Eigið góða helgi 😊

Bk. Inga Sif, Íris, Sara og Nanna.

Langar að biðja ykkur um að staðfesta þennan póst við mig. Það virðist því miður vera þannig að upplýsingar eru ekki alltaf að komast til skila og því væri gott að fá staðfestingu frá ykkur á því að pósturinn hafi komist til skila.

Það verður skipulagsdagur þann 27.október og verður leikskólinn lokaður þann dag.

Vikan 28.sept.-2.október 2020

Vikurnar líða hratt og upp er runninn október :) Eins og alltaf hefur verið nóg að gera hjá okkur i leik og starfi. 

Í hópastarfi þessa vikuna höfum við lagt inn málhljóðið Dd, farið með tákn málhljóðsins, sungið vísuna og skoðað myndir í Lubba bókinni. Börnin eru ótrúlega flink með táknin sem tilheyra málhljóðunum, og eru þau mörg farin að gera táknin ómeðvitað. Alltaf skemmtilegar og notalegar stundir með honum Lubba okkar. Í næstu viku tökum fyrir málhljóðið Íí. Við áttum góðar lestrarstundir með hópunum okkar þar sem aðal markmið okkar er að efla málþroska, auka orðaforða, vekja forvitni og efla einbeitingu þeirra. Þess vikuna höfum við unnið með litina, gulan ,rauðan, grænan og bláan í gegnum kubbaleik, við erum byrjuð að æfa okkur í að telja saman og erum mjög upptekin af formum í umhverfinu okkar. Einnig leggjum við markvisst inn hin ýmsu hugtök og orð/setningar í okkar daglega starfi með börnunum. Eins og áður hefur komið fram er frjálsi leikurinn í hávegum hafður í okkar starfi, við æfum okkur í að leika saman, deila hlutum með öðrum og þróa góð samskipti.

Í næstu viku ætlum við að byrja að vinna með  "Könnunarleikinn" við ætlum að bjóða börnunum upp á leikjastund í hópastarfi með mismunandi og spennandi efnivið. Sjá nánar um "Könnunarleikinn inn á " https://sites.google.com/site/gildileiks/konnunarleikurinn

Leikvangur - árgangur 2018: Það var skemmtilegur tími hjá Kollu að venju, hún bauð upp á krefjandi þrautabraut og slökun í lokin.

Smiðja - árgangur: Börnin fengu að sulla með vatn og ýmsan spennandi efnivið.

Listsköpun - allur hópurinn. Börnin fengu að spreyta sig með wc rúllu (sem pensil) málningu og hvítt karton. Þau skemmtu sér konunglega í sköpun sinni.

Í dag áttum við skemmtilega söngstund sem við köllum GAMAN SAMAN á yngri gangi. Við sungum hástöfum Lubba vísurnar og í lokin tókum við dans við lagið "Gummy bear" á þýsku....í tilefni þess að það er þýskur dagur í dag.

Einnig höfum við notið útiveru, leikið og sprellað, dansað, sungið, spilað á hljóðfæri og átt notalegar stundir saman.

Takk fyrir vikuna og njótið helgarinnar.

Bk. Inga Sif, Íris, Sara og Nanna.

Vikan 21.- 25.september

Kæru foreldrar 

Þá er þessi pínu skrítna vika að lokum komin. Þrátt fyrir sóttvarnartakmarkanir og smávægilega breytinga á dagskipulagi okkar í upphafi dags, þá hefur allt starf leikskólans gengið að óskum. Við höfum haft það mjög gott saman og notið vel í leik og námi.

Hópastarf: Í hópastarfi þessa vikuna höfum við lagt inn málhljóðið Nn, farið mð tákn málhljóðsins, sungið vísuna og skoða myndir í Lubba bókinni. Í næstu viku tökum við fyrir málhljóðið Dd. 

Frjálsi leikurinn á sinn fasta sess í okkar hópastarfi, en þar fá börnin að njóta sín í sjálfsprottnum leik í fámennum hópi. Frjáls og sjálfsprottin leikur er ekki aðeins gleðigjafi fyrir barnið heldur fer mikið nám þar fram og starf. Við höfum átt gæðalestrarstundir með hópunum okkar í vikunni sem við höfum notið til hins ýtrasta. Við lesum mikið og hafa Mímí bækurnar verið í sérstöku uppáhaldi hjá okkur síðustu vikurnar sem og aðrar bækur sem efla orðaforða barnanna.

Listsköpun - allur hópurinn. Börnin fingramáluðu listaverk.

Smiðja -  árgangur 2018: Verkefni þessa vikuna var haustmynd.

Leikvangur - árgangur 2018: Þrautabraut og slökun í lokin.

Ekki má gleyma að við höfum einnig sungið og trallað mikið, leikið og spilað á hljóðfæri, vá hvað það var gaman. Við erum búin að vera með lagið "Baby shark" á heilanum í margar vikur og börnin eru sko með hreyfingarnar á hreinu.

Þessa vikuna höfum við byrjað daginn og endað daginn á útiveru bara gleði og gaman.

Þökkum ykkur kæru foreldrar fyrir samvinnuna þessa vikuna.

Eigið yndishelgi með gullmolunum ykkar og við hlökkum til að sjá ykkur á mánudaginn.

Bk. Inga Sif, Íris, Sara og Nanna.

Vikan 14.- 17.september

Kæru foreldrar

Við erum búin að eiga góðar stundir saman þessa vikuna í leik, námi og notalegheitum. Það er gaman að segja frá því hve vel börnin þekkja orðið rútínur deildarinnar. Lítið dæmi: eftir hópastarf þá bjóðum við upp á frjálsan leik og notalegheit með bækur. Þegar líða fer að hádegismat þá hringjum við litlu bjöllunni okkar (sem þýðir tiltekt) þá líta þau á okkur stórum augum og vita nákvæmlega hvað bjölluhringingin þýðir, þau hendast í að ganga frá. Að tiltekt lokinni, setjast þau öll sem ein í samveruhornið og bíða átekta eftir því að við kennararnir hefjum raust okkar í söng og gleði. Þvílíkir Lækjar gullmolar, svo örugg og ánægð. 

Hópastarf: Í hópastarfi þessa vikuna höfum við lagt inn málhljóðið Bb, farið með tákn málhljóðsins og sungið vísuna góðu um Bb. Í næstu viku tökum við fyrir málhljóðið Nn. Við vinnum mikið með leikinn í hópastarfi, en að vinna með litla hópa er frábær vettvangur til að efla félagsfærni og samleik á milli barnanna, við fylgjumst náið með samskiptum þeirra og veitum leiðsögn ef þarf. Með tímanum læra þau að eiga góðan leik með vinum sínum, skiptast á leikföngum og að taka tillit til hvors annars. Blær kom í heimsókn og fengu þau að knúsa litlu góðu vininina sína, en hvert barn á sinn Blæ. Í Blæ stundunum kennum við þeim fyrstu samskiptin og leggjum grunn að því að þau séu góð hvert við annað. Einnig lásum við sögurnar "Mími fer í föt og Mímí fer að hátta" fyrir alla hópana.

Listsköpun í dag fimmtudag: Rauði hópur fékk að spreyta sig í að koma cheerios hringjum upp á plaströr. Frábær æfing fyrir fínhreyfingar og einbeitingu, börnin leystu verkefnið með mikilli prýði en mest var þó spennandi að gæða sér á cheerios hringjunum í lokin. Guli og græni hópur fékk leir og ýmis áhöld til að leika með. Saman útbjuggum við skemmtilegar fígúrur og lögð var áhersla á hugtök eins og stuttur og langur, og að sjálfsögðu fengu þau einnig að smakka á cheerios hringjunum sem þau borðuðu með bestu lyst.

Smiðja 2018: Þessa vikuna unnu börnin sandmynd.

Leikvangur 2018: Þrautabraut og slökun í lokin.

Eins og alltaf höfum við notið útiverunnar eftir síðdegishressingu og hlaupið um, leikið og ærslast með vinum okkar.

Takk fyrir góða viku og eigið góða langa helgi :)

Bk. Inga Sif, Íris, Sara og Nanna.

11.september 2020

Kæru foreldrar :)

Í hópastarfi þessa vikuna höfum við lagt inn málhljóðið Mm, skoðað myndir sem eiga Mm og sungið Mm vísuna. Börnin eru mjög hrifinn af Lubba og njóta þess að knúsa hann og kjassa. Við nýtum hvíldarherbergið okkar fyrir Lubbastundirnar en þar höfum við límt á einn vegginn myndir af Lubba í allskyns skemmtilegum aðstæðum. Börnunum finnst ótrúlega gaman að skoða og benda á myndirnar og eigum við dásamlegar samræður um það sem er að gerast á myndunum. Málhljóðið Bb verður tekið fyrir  næstu viku.

Við erum byrjaðar að leggja inn og leika með litina, gulan, rauðan, grænan og bláan. Við lékum okkur með  stóra og litla kubba í þessum litum, byggðum saman hús og bíla og lögðum inn litina í leiðinni. Þessa liti ætlum við að vinna með í allan vetur í leik og námi. Börnin fengu að heyra sögur í hópastarfi um Mími en þessar barnabækur eru frábærar málörvunarbækur sem gaman er að lesa með þeim.

Hver hópur fékk að fara í hlutverkakrókinn á yngri gangi með hópstjóra sínum. Þar lögðum við áherslu á leikinn þeirra á milli og njóta saman sem hópur.

Á fimmtudaginn fengu börnin að teikna með svörtum tússpenna fyrstu sjálfsmyndina sína, en þessi mynd fer í ferilmöppuna þeirra. 

Smiðja 2018 árgangur - verkefni vikunnar var að mála listaverk með pensli og appelsínugulri og rauðri málningu.

Leikvangur 2018 árgangur - boðið var upp á þrautabraut og slökun í lokin.

Einnig kíkti Blær bangsi í heimsókn, við sungum og trölluðum, dönsuðum, skoðuðum fullt af skemmtilegum bókum, lituðum, lékum okkur með dýrin, bílana, pússluðum og áttum góða stundir í útiveru í litla garðinum okkar.

Ansi góð og fjölbreytt vika senn á enda :)

Eigið góða helgi og hlökkum til að sjá ykkur á mánudaginn.

Bk. Inga Sif, Íris, Sara og Nanna.

4.september 2020

Kæru foreldrar 

Við höfum átt góða viku saman á Læk. Skipulagt starf hófst á mánudaginn og erum við byrjaðar að innleiða það sem við settum upp fyrir september. Við förum rólega af stað því við erum enn að kynnast og aðlagast. Í hópastarfi þessa vikuna fengu börnin að kynnast honum Lubba, en hann ætlar að hjálpa okkur með málhljóðin og táknrænu hreyfingarnar í vetur. Börnin fengu að leika með Lubba og knúsuðu hann mikið. Þessa vikuna tókum við fyrir málhljóðið Aa, sýndum þeim myndir úr bókinni um Lubba og sungum vísuna um Aa. Í næstu viku tökum við fyrir málhljóðið Mm. Sjá nánari upplýsingar um námsefnið "Lubbi finnur málbein"inná heimasíðu Fífusala.

Börnin fengu líka að kynnast Blæ bangsa í fyrsta sinn, og fengu í kjölfarið sinn eigin bangsa. Blær bangsi er vináttuverkefni á vegum Barnaheilla og er forvarnarverkefni gegn einelti í leikskóla. Markmið  verkefnisins er meðal annars að þróa getu barna til að sýna hvort öðru umhyggju og styðja félaga sína og verja. Litlu bangsarnir hugga og styðja og eru vinir barnanna. Við komum til með að vinna með þessi góðu gildi sem Blær stendur fyrir í starfinu okkar með börnunum í vetur.

Á fimmtudaginn var listsköpun. Börnin fengu að mála með litlum rúllupenslum á hvítt blað, þau voru ótrúlega dugleg og er fyrsta listaverk þeirra komið í hús.

Einnig höfum við verið dugleg þessa vikuna að syngja, dansa, teikna/æfa fínhreyfingar, lesa bækur, leika bæði úti og inni og bara hafa það gaman.

Takk fyrir þessa góðu viku og eigið góða helgi.

Bk. Inga Sif, Íris, Sara og Nanna.

28.ágúst 2020

Ágústmánuður hefur einkennst af því að kynnast og koma á góðum tengslum og verður aðalmarkmið okkar næstu mánuði að byggja upp öryggi og traust, efla félagsleg tengsl og sjálfstæði barnanna. Þriðjudaginn 1.september hefst skipulagt starf í Fífusölum. Þið fáið senda heim námsáætlun fyrir einn eða tvo mánuði í senn. Í þessari áætlun koma fram áherslur deildarinnar í starfi með börnunum ykkar. Eins er þar að finna viðburði sem eru framundan sem og aðrar upplýsingar. Dagskipulag deildarinnar og hópaskiptingu fáið þið einnig.

Í vetur ætlum við að leggja áherslu á að hafa það gaman í leik og námi. Vinátta og samskipti verða einnig ofarlega á baugi, en í samskiptum við vini sína læra börn félagslega færni á borð við samvinnu, hlusta á aðra og að deila með öðrum. Vinátta veitir hlýju og öryggi og hún byggir upp sjálfsmynd barna. Í gegnum vináttu þróa þau með sér samkennd og færni til að geta sett sig í spor annarra. Að fá að vera með í leik og eignast vini er grunnur að góðri líðan og að hafa það gott í leikskólanum og lífinu. 

Í september mánuði ætlum við að vinna með þemað "fjölskyldan mín" og væri fínt að fá blöðin með myndum af fjölskyldu barnsins fljótlega eftir helgi.

• Aðlögunarviðtöl verða fljótlega og mun ég senda á ykkur upplýsingar þegar nær dregur.
• Vala.is - minnum á að tilkynna þarf frí eða veikindi barns fyrir klukkan 9:00 í leikskólann. Ef um veikindi er að ræða þá er mikilvægt að láta fylgja með hvað sé að vegna skráningar í heilsubók barnsins. Klukkan 9:00 hefst skipulagt starf og gott að vita hvernig barnahópurinn stendur þann daginn.
• Minnum á að merkja snuð barnanna sem og útifatnað og skófatnað.

Endilega hafið samband ef einhverjar spurningar vakna varðandi námsáætlunina eða annað sem tengist leik eða námi barnanna ykkar.

Takk fyrir góða viku og njótið helgarinnar.

Bestu kveðjur, Inga Sif, Íris, Sara og Nanna.

21.ágúst 2020

Kæru foreldrar :)

Vikan hjá okkur hefur verið einstaklega góð. Nú eru flest börnin komin á deildina, síðustu tvö mæta á þriðjudaginn 25.ágúst.

Aðlögunin á deildinni gengur mjög vel og eru þau öll níu sem komin eru ótrúlega dugleg, þau eru örugg og sýna okkur mikið traust, koma til okkar og leita í faðma okkar þegar þau vilja. Þessa vikuna hefur veðrið leikið við okkur og höfum við notið þess að vera úti bæði fyrir hádegi og eftir hádegi. Einnig höfum við átt góðan leik inni á deild, en mikið er af spennandi leikföngum sem gaman er að skoða og handfjatla.

Takk fyrir frábæra viku og eigið góða helgi :)

Bestu kveðjur frá okkur á Læk, Inga Sif, Íris, Sara og Nanna.

14.ágúst 2020

Kæru foreldrar

Þá er góð vika senn á enda hjá okkur á Læk. Við höfum haft í nægu að snúast, fjórir nýir vinir komu í aðlögun á þriðjudaginn og það er búið að vera mikil gleði og gaman í barnahópnum. Aðlögunin hefur gengið mjög vel og hlökkum við mikið til að eyða næstu vikum í að kynnast og tengjast. 

• Síðasti dagurinn hennar Karenar Hrundar er í dag en hún hefur verið starfsmaður á Læk þetta sumarið. Við  þökkum henni innilega fyrir samstarfið og kveðjum við hana með söknuði.
• Minnum á mikilvægi þess að merkja föt barnanna, skó og stígvél.
• Á föstudögum þarf að taka með heim í lok dags, útiföt og annað sem er í hólfum barnanna ykkar.

Eigið góða helgi og við hlökkum til að sjá ykkur á mánudaginn.

Bestu kveðjur frá okkur á Læk, Inga Sif, Íris, Sara og Karen Hrund.

26.júní 2020

19.JÚNÍ 2020

 29.maí 2020

Kæru foreldrar

Þá fer vetrarstarfi leikskólans að ljúka eftir frábært, lærdómsríkt og innihaldsríkt skólaár (við tölum ekkert um fordæmalausu tímana). Hópastarf og málörvunarhópa höfum við lagt til hliðar, smiðjan er komin út og fara börnin í skemmtilegar vettvangsferðir með Nönnu. Náttúran í nánasta umhverfi skólans er þar í brennidepli og leitum við m.a. af spennandi efnivið til listsköpunnar. Í næstu viku tekur svo sumarstarfið við með mikilli útiveru, leik og gleði. Það verður t.d hjóladagur hjá okkur á Læk föstudaginn 5.júní en þá mega börnin koma með hjólin sín í leikskólann (þríhjól, hlaupahjól eð tvíhjól), mikilvægt er að taka hjálminn með. Við komum til með að fara út fyrir garðinn og hjóla á milli Salalaugar (Gerplu) og Fífusala. Ég minni á daginn þegar nær dregur.

En aðeins að vikunni sem er að líða, en hún er búin að vera mjög skemmtileg og viðburðarrík, en vikan byrjaði á sulludegi. Farið var út með brunaslöngu og sulluker og fengu börnin að leika sér með vatn og ýmis útileikföng. Börnin sulluðu og drullumölluðu og skemmtu sér konunglega, sjá myndir inn á Facebook. Við fögnuðum 4 ára afmæli einnrar blómarósarinnar okkar sem bauð vinum sínum uppá saltstangir og popp í tilefni dagsins. Við fórum í Leikvang sem hefur verið einn af hápunktum tilverunnar hjá börnunum í vetur en síðasti tíminn hjá Kollu verður á þriðjudaginn kemur. Þó hópastarf sé komið í hvíld þá höldum við enn í hópanna okkar þegar innivera er, nú er það leikurinn sem við einblínum á og höldum við því þannig þar til þau flytjast yfir á eldri gang þann 11.júní n.k.

Aðlögun á eldri gang er hafin og hafa báðir hóparnir farið í heimsóknir á sínar deildir þess vikuna. Í næstu viku fara þau oftar í heimsókn og gott væri ef þau væru komin í leikskólann ekki seinna en kl.9:00.

Ef þið hafið einhverjar spurningar, endilega hafið þá samband.
Eigið góða hvítasunnuhelgi og við sjáumst hress og kát á þriðjudaginn.

DAGBÓK 6.mars 2020

Heil og sæl kæru foreldrar. 

Vikan hjá okkur á Læk hefur gengið mjög vel og höfum við notið þess út í eitt að leika bæði inni og úti, vera í hópastarfi og læra ýmislegt skemmtilegt í gegnum leik, hlusta á sögur, syngja, dansa (erum byrjuð að læra Daða dansinn) hreyfa okkur í leikvangi, skapa í smiðju og síðast en ekki síst að njóta samvista með vinum okkur.
                                                                     Nú var það leitin af tuttugasta og öðru málbeininu í Lubbastundinni okkar, sem þessa vikuna var málhljóðið Öö. Við sungum vísuna, æfðum málhljóðið og tákn vikunnar. Einnig skoðuðum við í Öö kassann og æfðum okkur að klappa hlutina sem við tókum upp úr kassanum í samstöfur. 

Hópastarf mánudagur 9:45-10:45
Guli hópur: Bínureglurnar yfirfarnar. Börnin sögðu fullt nafn og klöppuðu nafnið sitt í samstöfur. Unnið með liti – appelsínugulan, brúnan, bleikan og fleiri liti. Í lokin teiknuðu börnin höfuðfætlu/sig sjálf.
Rauði hópur: Bínureglurnar yfirfarnar. Byrjuðum á nýrri bók sem heitir “Felustaðirnir hans Hermanns” í þessari bók er lögð áhersla á hugtökin uppi, inni, ofan í, undir og bak við. Klöppuðum eins og venjulega fullt nafn í samstöfur/atkvæði. Unnum með numicon stærðfræðikubba og tölur frá 1-5. Börnin áttu að finna rétta numiconformið við tölustafinn og finna réttan fjölda/dýr við. Í lokin spiluðu við orðahljóðalottó, þetta spil er hægt að spila sem myndalottó og stafaspil. Spilið “Orðahljóð” þjálfar tæknilega hlið lestrar og umskráningu, sem merkir einfaldlega að breyta hljóðum í bókstafi og stöfum í hljóð.
Græni hópur: Bínureglurnar yfirfarnar. Börnin spiluðu lottó með formum. Börnin léku sér með numicon stærðfræði kubba og tölur frá 1-10. Frjáls leikur í lokin.

Hópastarf fimmtudagur 9:00-9:45
                                                                     Frjáls leikur í hópastarfi og FLÆÐI á milli Lækjar og Lautar. Einblínum á frjálsan leik og eflingu góðrar samskipta.

Hópastarf föstudagur 9:45-10:45
Guli hópur: Bínu reglurnar yfirfarnar. Börnin æfðu sig að fara með fullt nafn og farið var yfir formin sem við erum að leggja inn. Unnið með sköpun – börnin fengu að mála með vatnsmálningu. Frjáls leikur í lokin.
Rauði hópur: Bínu reglurnar yfirfarnar. Klárðuðum bókina “Felustaðirnir hans Hermanns”. Sögðum fullt nafn og hvað foreldrar okkar heita. Unnum með form, tígul, sívalning, sporöskju, þríhyrning og fl. Í lokin fengu börnin að að klippa út formin.
Græni hópur: Bínu reglurnar yfirfarnar. Þau spiluðu skemmtilegt málörvunarspil og æfðu fínhreyfingar með að spora tölustafi. Frjáls leikur í lokin.

Góða helgi og njótið vel :)
                                                                     Inga Sif, Íris, Sumaia, Brynhildur, Nanna og Lilja Rún.

DAGBÓK 28.febrúar 2020

Heil og sæl kæru foreldrar.

Þá er þessi skemmtilega og viðburðarríka vika á enda. Það er búið að vera í nógu að snúast hjá okkur í Fífusölum, enda margir skemmtilegir dagar í þessari viku. Á mánudaginn - bolludaginn fengum við ljúffengar kjötbollur í hádeginu og rjómabollur með súkkulaði í síðdegishressingunni.
                                                                     Á þriðjudaginn var svo sprengidagur og þá borðuðum við á okkur gat af saltkjöti og baunum. Síðan rann upp langþráður öskudagur J við byrjuðum daginn á að hafa það huggulegt á yngri gangi borðuðum hafragraut og nutum lífins með vinum okkar. Öskudagsball var svo í matsal, en þar var dansað og tjúttað og skemmtu börnin sér konunglega. Síðan var komið að bíói og pizzaveislu sem slógu heldur betur í gegn.

Blær bangsi og vináttuverkefnin hans voru á sínum stað, og eru börnin okkar að verða alltaf meir og meir meðvitaðri um sínar eigin tilfinningar og eiga léttara með að útskýra fyrir okkur hvernig þeim líður í amstri dagsins.

Nú var það leitin af tuttugasta og öðru málbeininu í Lubbastundinni okkar, sem þessa vikuna var málhljóðið Kk. Við sungum vísuna, æfðum málhljóðið og tákn vikunnar. Einnig skoðuðum við í Kk kassann og æfðum okkur að klappa hlutina sem við tókum upp úr kassanum í samstöfur. Börnin eru orðin ótrúlega flink að klappa í samtöfur bæði stutt og löng orð og finna út hve mörg atkvæði þau eiga.
                                                                     Í leikvangi þessa vikuna var boðið uppá upphitunarleik, þrautabraut og slökun. Í smiðju fengu þau að spreyta sig á skemmtilegum verkefnum, þau fengu m.a. að teikna, æfa sig í litum og formum. Flæðið á milli deildanna gengur vonum framar og erum við hæst ánægð með hvað vel gengur hjá börnunum að tengjast í leik og starfi.

Hópastarf mánudagur 9:45-10:45
Guli hópur: Farið yfir Bínureglurnar. Börnin æfðu sporun og blýantsgrip, þau sporuðu tölustafi frá 1-10. Í lokin spiluðu þau spil þar sem lögð var áhersla á liti, fínhreyfingar, þolinmæði og samvinnu.
Rauði hópur: Farið yfir Bínureglurnar. Kláruðum bókina  “Bína lærir hljóð og stafi”. Við klöppuðum fullt nafn í samstöfur/atkvæði. Lékum okkur frjálst með numicon stærðfræðikubba og spjöld. Unnum með tölur og kubba, fundum jafnmarga kubba og talan sagði til um. Spiluðu lottóspil með formum - áhersla á skilning á formhugtökum og litum.
Græni hópur: Farið yfir Bínureglurnar. Lásu bókina “Bína bálreiða fer í leikskóla”. Börnin æfðu sig í að klippa með skærum. Í lokin fengu þau að æfa sig í að sortera liti og leika sér frjálst með numicon stærðfræðikubbana.

Hópastarf fimmtudagur 9:00-9:45
                                                                      Frjáls leikur í hópastarfi og FLÆÐI á milli Lækjar og Lautar. Einblínum á frjálsan leik og eflingu góðrar samskipta.

Hópastarf föstudagur 9:45-10:45
Guli hópur: Farið yfir Bínureglurnar. Lék sér með numicon stærðfræðikubba og spjöld. Einnig var unnið með talanskilning og lögð var áhersla á tölur frá 1-10. Frjáls leikur í lokin.
Rauði hópur: Farið yfir Bínureglurnar. Lásum sögu um hann “Finn fíl” sem er verkefni úr málörvunarheftinu“Tölum saman” hér er unnið með heyrnaminni og einbeitingu. Æfðum okkur að spora tölustafi frá 1-10. Einnig fékk Blær bangsi dásamlegt kroppanudd frá vinum sínum og í lok tímans fengu þau að lita Blæ bangsa.
Græni hópur: Farið yfir Bínureglurnar. Unnu með tölur frá 1-10, börnin æfðu sig í að telja og finna ákveðnar tölur. Æfðu sig í að klippa, þennan daginn voru það form sem þau klipptu út meistaralega. Í lokin fengu þau að pússla og leika sér frjálst.

Takk fyrir góða viku og við sjáumst hress á mánudaginn

Inga Sif, Íris, Sumaia, Brynhildur, Nanna og Lilja Rún.

DAGBÓK

21.febrúar 2020

Heil og sæl kæru foreldrar.
                                                                       Dásamleg vika á enda hjá okkur á Læk. Við áttum góðan og skemmtilegan dótadag og voru börnin dugleg að leyfa vinum sínum að skoða leikfangið sitt og leika með það.
                                                                       Nú var það leitin af tuttugasta og fyrsta málbeininu í Lubbastundinni okkar, sem þessa vikuna var málhljóðið Tt. Við sungum vísuna, æfðum málhljóðið og tákn vikunnar. Einnig skoðuðum við í Tt kassann, þar voru margir skemmtilegir hlutir sem áttu þann staf.
                                                                       Í leikvangi þessa vikuna var boðið uppá upphitunarleik, þrautabraut og slökun. Engin smiðja var þennan fimmtudaginn. Við höfum notið veðurblíðunnar þessa vikuna, leikið mikið úti og farið í vettvangsferðir með hópana okkar.

Hópastarf mánudagur 9:45-10:45
Guli hópur: Fór yfir Bínureglurnar sem byggja á bókinni um Bínu bálreiðu. Lesin var sagan um “Kettina þrjá”. Börnin æfðu sporun og sporuðu tölustafi frá 1-10. Í lokin spiluðu þau spil þar sem lögð er áhersla á liti, fínhreyfingar, þolinmæði og samvinnu.
Rauði hópur: Fór yfir Bínureglurnar sem byggja á bókinni um Bínu bálreiðu. Við héldum áfram að lesa bókina “Bína lærir hljóð og stafi”. Æfðum okkur í að klippa hring, það var svolítið erfitt. Við komum til með að æfa okkur mikið í að klippa næstu vikurnar. Við klöppuðum nöfnin okkar í samstöfur/atkvæði og nú erum við byrjuð að æfa okkur að telja atkvæðin um leið og við klöppum. Púsluðum spil þar sem áhersla var lögð á að koma myndspilum í rétta tímaröð.
Græni hópur: Fór yfir Bínureglurnar sem byggja á bókinni um Bínu bálreiðu. Lásu bókina “Bína bálreiða fer í leikskóla”. Unnið var með liti og fengu börnin að sortera skemmtileg lituð dýr með klípu sem er hugsuð er til að æfa fínhreyfingar/tangargripið. Einnig var farið yfir og leikið með hugtök eins og t.d. yfir, undir, til hliðar, inní og fl. Í lokin fengu börnin að æfa sig í að spora og leika frjálst.

Hópastarf fimmtudagur 9:00-9:45
                                                                       Frjáls leikur í hópastarfi og FLÆÐI á milli Lækjar og Lautar. 

Hópastarf föstudagur 9:45-10:45
Guli hópur: Fór yfir Bínu bálreiðu reglurnar. Bókin um “Kettina þrjá” var kláruð. Verkefni - form sem börnin hafa áður leikið og unnið með. Þau æfðu fínhreyfingar, lituðu og klipptu út formin. Í lokin fengu þau að spila spil og leika frjálst.
Rauði hópur: Fór yfir Bínu bálreiðu reglurnar. Klárðuðu að lesa bókina “Bína lærir hljóð og stafi”. Unnu með Numicon – stærðfræðikubba og fengu að leika frjálst með kubbana og spjöldin góðu.
Græni hópur: Fór yfir Bínu bálreiðu reglurnar. Héldu áfram að lesa bókina "Bína bálreiða fer í leikskóla". Börnin æfðu sig í að spora og vinna með rétt blýantsgrip. Frjáls leikur í lokin.

Spennandi vika framundan :) Bolludagur er á mánudaginn, með kjötbollum í hádeginu og rjómabollum í síðdegishressingu. Boðið verður upp á saltkjöt og baunir á sprengidaginn og á öskudaginn verður náttfatadagur í Fífusölum, sem við bíðum öll spennt eftir. 

Takk fyrir góða viku og við sjáumst hress á mánudaginn.
                                                                        Inga Sif, Íris, Sumaia, Brynhildur, Nanna og Lilja Rún.

DAGBÓK

14.febrúar 2020

Kæru foreldrar þá er ein önnur vikan á Læk á enda. Við áttum mjög góða viku saman og höfum notið þess að læra og leika saman, í frjálsum leik, hópastarfi, samveru og útiveru. Báðir hóparnir fóru í vettvangsferð þessa vikuna í bylmingskulda og roki. Við létum það ekkert á okkur fá enda erum við hraust með eindæmum J Hópur 1 labbaði að Salaskóla og lék sér þar dágóðan tíma á útisvæði skólans. Hópur 2 fór að leikvelli í nærumhverfinu og átti góðan leik þar með hópnum sínum. Nú var það leitin af tuttugasta málbeininu í Lubbastundinni okkar, sem þessa vikuna var málhljóðið Pp. Við sungum vísuna, æfðum málhljóðið og tákn vikunnar.
                                                                         Í leikvangi þessa vikuna var boðið uppá þrautabraut og slökun. Við höfum verið ansi dugleg að lesa þessa vikuna eins og alltaf, bæði í samveru og í hópastarfi og eru bókatitlarnir orðnir ansi margir sem höfum við lesið saman. Í smiðju fengu þau að spreyta sig á spennandi litablöndunarverkefni. Alltaf nóg um að vera hjá Nönnu. 

Hópastarf mánudagur 9:45-10:45
Guli hópur: Vann verkefni þar sem áhersla var lögð á 1-10. Börnin fengu svo í lokin að lita tölustafina. Fín æfing fyrir fínhreyfingar og blýantsgrip.
Rauði hópur: Lásum nokkrar bls. úr bókinni “Bína lærir hljóð og stafi” Lékum okkur með numicon stærðfræðikubba og tölustafi frá 1-10. Æfðum talnaskilning og talningu með numicon formin til hliðsjónar. Lékum okkur að ríma og klappa skemmtileg og löng orð í samstöfur.
Græni hópur: Æfðu fínhreyfingar, börnin teiknuðu og klipptu. Í lokin fengu þau að byggja allskyns hluti úr skemmtilegum kubbum sem við fengum að láni frá eldri gangi.

Hópastarf fimmtudagur 9:00-9:45
                                                                         Buðum upp á frjálsan leik í hópastarfi og FLÆÐI á milli Lækjar og Lautar.

Leikskólinn var lokaður í dag föstudaginn 14.febrúar vegna óveðurs.

Þriðjudaginn 18.febrúar verður LEIKFANGADAGUR. Þá mega börnin koma með eitt dót að heiman og leika með í leikskólanum. Muna að merkja vel J

Takk fyrir góða viku og við sjáumst hress og kát í næstu viku.
                                                                         Inga Sif, Íris, Sumaia, Brynhildur og Lilja Rún.

DAGBÓK

7.febrúar 2020

Þessa vikuna áttum við flottan afmælisprins sem bauð vinum sínum í afmælisfagnað 😊 Hipp hipp hurra fyrir honum J
                                                                         Hópur 2 heimsótti bókasafn Kópavogs þar sem Gréta Björg bókasafnafræðingur tók á móti börnunum og las fyrir þau spennandi sögur.
                                                                         Hópur 1 fór í vettvangsferð og labbaði góðan hring í kringum leikskólann í rigningu og roki. Fínasta ferð sem endaði á leikvelli í nærumhverfinu áður en við héldum heim á leið í hádegismat. Nú var það leitin af nítjánda málbeininu í Lubbastundinni okkar, sem þessa vikuna var málhljóðið Oo. Við sungum vísuna, æfðum málhljóðið og tákn vikunnar. Kíktum í málbeinakassann og hlutirnir sem áttu Oo skoðaðir.
                                                                         Í leikvangi þessa vikuna var boðið upp á upphitunarleik, þrautabraut og slökun.
                                                                         Í smiðju kláruðu börnin að skreyta og mála bolluvendina sína.
                                                                         Kæru foreldrar yndisþakkir fyrir komuna í gestakaffið, í tilefni af degi leikskólans. En þennan dag 6.febrúar árið 1950 stofnuðu frumkvöðlar leikskólakennara fyrstu samtök sín. Leikskólar landsins hafa á undanförnum árum haldið upp á dag leikskólans með margbreytilegum hætti en markmiðið með deginum er að vekja athygli á þýðingu leikskóla fyrir börn og skapa jákvæða ímynd leikskólakennslu.

Hópastarf mánudagur 9:45-10:45
Guli hópur: Útikennsla – hópurinn fór með kennurum sínum út fyrir leikskólann með vatnsliti, vatn og pensla. Þau fundu sér gott svæði til að skapa listaverk í snjónum, ótrúlega spennandi verkefni og skemmtileg samvera. Útikennsla gefur mikla möguleika á ýmiss konar upplifun, ásamt því að ýta undir ímyndunarafl og forvitni barnanna. Í lokin renndu þau sér á rassaþotum, sem var hápunktur ferðarinnar.
Rauði hópur: Kláruðu að lesa bókina “Hvað er það sem gerir okkur reið” við erum orðin ansi flink að spjalla og vinna með tilfinningar eins og reiði, gleði og leiða. Æfðum okkur í að spora tölustafi – áhersla lögð á rétt blýantsgrip.
                                                                         Hljóðkerfisvitund: Æfðum rím og klöppuðum fullt nafn í samstöfur/atkvæði. Frjáls leikur í lokin.
Græni hópur: Vann með málörvunarspil þar sem lögð var áhersla á læsi og leik. Markmiðið með spilinu er að efla orðaforða og málskilning barnanna. Hljóðkerfisvitund: Æfðu rím og lesin var saga úr málörvunarheftinu “Tölum saman”. Frjáls leikur í lokin.

Hópastarf fimmtudagur 9:00-9:45
Guli, rauði og grænifrjáls leikur í öllum hópum. Í gegnum leikinn vinnum við alla daga markvisst með að efla félagsfærni barnanna okkar en góð félagsfærni auðveldar börnum að lesa í umhverfi sitt og átta sig á hvaða hegðun er æskileg í samskiptum við aðra. Félagsfærni er færni í mannlegum samskiptum og snýst um að eiga jákvæð samskipti, samvinnu í leik og geta fundið lausn á ágreiningsmálum sem koma upp hverju sinni. 

Hópastarf föstudagur 9:45-10:45
Guli hópur: Lásu bókina “Þrír litlir kettlingar”. Börnin sögðu til nafns, klöppuðu nafnið sitt og önnur skemmtileg orð í samstöfur/atkvæði.Spiluðu spil, þar sem lögð var áhersla á samvinnu á milli barnanna. Frjáls leikur í lokin.
Rauði hópur: Börnin sögðu til nafns, fullt nafn. Lásum bókina “Bína bálreiða fer í leikskóla” skoðuðum myndirnar og spjölluðum. Æfðum okkur að ríma og klappa nafnið okkar og önnur orð í samtöfur/atkvæði. Lékum okkur með skemmtilegt pússluspil þar sem börnin þurftu að raða pússluspilunum í rétta tímaröð. Frábært samvinnuverkefni allir hjálpuðust að. Æfðum hugtökin fyrir framan, aftan, undir, við hliðina og fl. Enduðum hópastarfið á að teikna með tússlitum. Frjáls leikur í lokin.
Græni hópur: Æfðu sporun – fínhreyfingar/blýantsgrip. Léku sér með Numicon stærðfræðikubba og tölur frá 1-10. Í lokin fengu þau smíðaverkefni þar sem þau léku sér með form og liti.

Takk fyrir góða viku og við sjáumst hress í næstu viku.
                                                                         Inga Sif, Íris, Sumaia, Brynhildur og Lilja Rún.

DAGBÓK

31.janúar 2020

Dásemdarveður hefur einkennt þessa vikuna og höfum við farið út á hverjum degi eftir síðdegishressingu. Börnin okkar hafa notið þess í botn að vera úti í góðum leik með vinum sínum. Farið var í bókasafn Kópavogs með hóp 1, Gréta Björg bókasafnafræðingur tók á móti okkur og las nokkrar vel valdar sögur fyrir hópinn. Hópur 2. fór í skemmtilega ferð út fyrir leikskólann, fundu sér góða brekku þar sem þau skemmtu sér konunglega við að renna sér á rassaþotum. Í Blæ samverustundunum unnum við með nokkur tilfinningasjöld, við tókum fyrir ákveðna umræðupunkta um tilfinningar og hinar ýmsu áskoranir sem börnin okkar þurfa stundum að kljást við í stórum barnahópi. Nú var það leitin af átjánda málbeininu í Lubbastundinni okkar, sem þessa vikuna var málhljóðið Ii. Við sungum vísuna, æfðum málhljóðið og tákn vikunnar. Kíktum í málbeinakassann og hlutirnir sem áttu Ii skoðaðir. Í leikvangi var boðið uppá þrautabraut og slökun. Í smiðju kláruðu börnin að skreyta og mála sjávardýrin sín. Næsta verkefni verður bolluvöndur, endalaus spennandi verkefni hjá Nönnu. Einnig höfum við leikið mikið, unnið að listaverkum í tilefni af Degi leikskólans, lesið á hverjum degi í samveru en við erum að lesa spennandi bækur (Palli var einn í heiminum og Karíus og Baktus) sem við fengum að láni frá bókasafni Kópavogs, haldið danspartý og notið þess bara að vera saman. Alltaf nóg að gera hjá okkur Lækjargenginu.

Hópastarf mánudagur 9:45-10:45
Guli hópur: Spiluðu skemmtilegt sniglaspil. Þetta spil reynir á samvinnu barnanna og þolinmæði, einnig er komið inn á stærðfræði/talningu og liti. Hópurinn fékk að vinna frjálst með Numicon stærðfræðikubba og spjöld sem fylgja með. Frjáls leikur í lokin.
Rauði hópur: Lásum saman bók sem heitir “Hvað er það sem gerir okkur reið” börnin voru mjög dugleg að tjá sig um þetta, en mikilvægt er að við hjálpum þeim að öðlast færni í að skilja og skilgreina eigin tilfinningar og koma orðum að þeim. Stærðfræði – Numicon og tölustafir. Að vinna með kubbana og tölustafi er frábær leið til að þau læri að sjá tengslin á milli talna og mynstursins í kubbunum. Hljóðkerfisvitund: Æfðum rím og klöppuðum fullt nafn í samstöfur/atkvæði. Frjáls leikur í lokin.
Græni hópur: Lék sér með Numicon stærðfræðikubba og spjöld. Unnu með liti og mynstur kubbana. Börnin fengu að spreyta sig á nýju spili en markmiðið með spilinu er að efla orðaforða og málskilning barnanna. Frjáls leikur í lokin.

Hópastarf fimmtudagur 9:00-9:45
Guli, rauði og grænihópur unnu með listsköpun, börnin teiknuðu og máluðu skemmtilegar myndir fyrir Dag leikskólans.

Hópastarf föstudagur 9:45-10:45
Guli hópur:Spiluðu spil, æfðu þolinmæði og samvinnu. Einnig léku þau sér frjálst með Numicon stærfræðikubba og tölur frá 1-10. Frjáls leikur í lokin.
Rauði hópur: Börnin sögðu til nafns, fullt nafn.Æfðum okkur að sortera liti, notuðum til þess klípu í sama lit og æfðum í leiðinni fínhreyfingar. Unnum með tölur frá 1-5 og fundum til fjöldann sem passaði við tölurnar. Lásum nokkrar blaðsíður úr bókinni “Ninni eignast vin” höldum áfram með hana í næstu viku. Frjáls leikur í lokin.
Græni hópur: Spiluðu spennandi málörvunarspil, hér var lögð áhersla á liti og hugtök eins og fyrir framan, í miðjunni, aftast og fl. Eins æfðu þau fínhreyfingar með því að þræða litla bókstafi upp á þráð. Frjáls leikur í lokin.

Takk fyrir góða viku og við sjáumst hress í næstu viku.
                                                                         Inga Sif, Íris, Sumaia, Brynhildur og Lilja Rún.

DAGBÓK

24.janúar 2020

Þá er kominn föstudagur og góð vika á Læk senn á enda. Því miður varð ekkert úr vettfangsferðinni okkar vegna slæms veðurs. Vonumst við til að veðrið verði skárra í komandi viku, en ætlunin er að fara með hóp nr.1 í heimsókn í bókasafn Kópavogs. Í Blæ vináttustundunum þessa vikuna voru tilfinningar ofarlega á baugi. Við fengum börnin til að tjá sig um hvað það er sem gerir þau glöð, reið og leið. Sköpuðust góðar umræður í hópnum um þetta málefni. Nú var það leitin af sautjánda málbeininu í Lubbastundinni okkar, sem þessa vikuna var málhljóðið Ss. Við sungum vísuna, æfðum málhljóðið og tákn vikunnar. Kíktum í málbeinakassann og hlutirnir sem áttu Ss skoðaðir. Í leikvangi var boðið uppá þrautabraut, leiki og slökun. Í smiðju er verið að vinna með spennandi þema-HAFIÐ og eru börnin að skapa, skreyta og mála sín eigin sjávardýr. Þorri – Síðustu tvær vikurnar höfum við frætt börnin um hvernig lífið var á Íslandi á öldum áður/í gamla gamla daga. Við höfum sýnt þeim bæði myndir og hluti frá þessum tíma m.a. ask, strokk og leikföng. Einnig voru þau mjög áhugasöm og upptekinn af matnum sem borðaður var á þessum tíma. Það voru því spennt Lækjarbörn sem settust að borðum í dag þar sem þorramaturinn beið þeirra. Einnig áttum við góða “gaman saman” stund á yngri gangi með öllum víkingabörnum leikskólans þar sem þau sungu hástöfum skemmtileg þorralög. 

Takk fyrir góða viku og við sjáumst hress og kát á mánudaginn

Bestu kveðjur Inga Sif, Íris, Lilja Rún og Brynhildur.

DAGBÓK

17.janúar 2020

Það er búið að vera nóg að gera á Læk þessa vikuna. Við erum búin að leika og læra mikið og eiga góðar stundir með vinum okkar. Flæðið/blöndunin á milli Lækjar og Lautar gengur vonum framar og sjáum við að tengsl eru að myndast á milli barnanna. Útivera hefur verið með mesta móti síðustu daga, og höfum við notið þess að leika úti með vinum okkar. Dásamleg vika með gullmolunum ykkar.

Vettvangsferð: Á miðvikudaginn fórum við í stutta vettvangsferð. Við löbbuðum að Lindarkirkju og dáðumst að fallega bleika litnum á himninum, einnig sáum við fjóra stóra krumma sveima yfir okkur. Létum þessa stuttu ferð duga að þessu sinni enda vorum börnin orðinn ansi þreytt þegar við nálguðumst leikskólann okkar. Markmiðið okkar er að fara aðeins lengra í næstu vettvangsferð.
Blær vináttustundir: Áttum góða samveru með Blæ bangsa þessa vikuna, ræddum og rifjuðum upp þau gildi sem Blær bangsi stendur fyrir sem er: Umhyggja, virðing, umburðarlyndi og hugrekki. Minntum þau á að passa upp á hvort annað og vera góður félagi allra.
Lubbastund: Nú var það leitin af sextánda málbeininu, sem þessa vikuna var málhljóðið Ff. Við sungum vísuna, æfðum málhljóðið og tákn vikunnar. Kíktum í málbeinakassann og hlutirnir sem áttu Ff skoðaðir.
Leikvangur með Kollu: Þrautabraut, leikir og slökun.
Smiðja: Börnin kláruðu víkingahjálmana og síðan byrjuðu þau á verkefni sem tengist sjónum. Þau klipptu út lífverur sem finnast í sjónum eins og krossfiska, skjaldbökur, hákarla og fl. Síðan máluðu þau dýrið sitt og skreyta það í næstu viku.

Hópastarf:

Mánudagur:
Guli hópur – Stærðfræði – börnin unnu og léku sér með Numicon stærðfræðikubba. Lögð var áhersla á formin á kubbunum og lögð inn hin ýmsu stærðifræðihugtök. Frjáls leikur í lokin.
Rauði hópur – Tilraun á útisvæði – börnin fóru út með hanska, vatn og matarlit. Við settum matarlit í vatn og helltum í gúmmíhanska. Bundum vel fyrir, fundum okkur tré og hengdum hanskana þar upp í. Við fylgdumst með hönskunum í vikunni, þeir frusu og bráðnuðu til skiptis. Ótrúlega spennandi.
Græni hópur – Stærðfræði – börnin unnu með Numicon stærðfræðikubba. Hér var einnig lögð áhersla á formin á kubbunum og lögð inn hin ýmsu stærðfræðihugtök. Frjáls leikur í lokin.
Fimmtudagur:
Guli hópur -  Furðuföt – við lögðum áherslu á uppbyggileg samskipti, æfðum okkur í að taka tillit, skiptast á, sýna þolinmæði, umburðarlyndi og samkennd.
Rauði hópur – Legó kubbar – við lögðum áherslu á sköpun, liti, form og eflingu orðaforða og hugtaka. Einnig æfðum við samvinnu.
Græni hópur– Sporun – börnin fengu að æfa sig í að spora tölustafi og form. Þau voru einbeitt og voru dugleg að horfa til vina sinna og athuga hvernig þeim reiddi af í þessu skemmtilega verkefni. Góð æfing fyrir fínhreyfingarnar og þá sérstaklega blýantsgripið okkar.
Föstudagur:
Guli hópur- Æfðu sig í að spora form og tölustafi.
Rauði hópur  - Við lásum söguum Unni Uglu og þurftu börnin að svara spurningum úr sögunni. Í lokin lituðum við form, hring, þríhyrning og ferning.
Græni hópur -Spiluðu litaspil og léku sér með skemmtileg form.

Takk fyrir góða viku og við sjáumst hress og kát á mánudaginn

Bestu kveðjur Inga Sif, Íris, Lilja Rún og Brynhildur.

DAGBÓK

10.janúar 2020

Gleðilegt ár kæru foreldrar og takk fyrir það gamla 😊

Við erum búin að eiga frábæra viku á Læk og eru mörg spennandi og skemmtileg verkefni framundan. 

Skipulagt starf er hafið og eru allir ánægðir að vera komnir að nýju í góðu gömlu rútínuna. Veðrið hefur aldeilis verið að stríða okkur og höfum við ekki farið út eins oft og við höfðum viljað. Snjóbylur og nístingskuldi hefur einkennt þess viku. En það voru hugrakkir krakkar sem klæddu sig út í snjóbylinn á fimmtudagsmorguninn. Börnin náðu vart andanum fyrst til að byrja með og fengu stingandi snjó í andlitið eins og þau sögðu sjálf frá. Heldur betur ögrandi, skemmtileg og spennandi útivera þennan morguninn, og voru þau ansi mörg börnin sem höfðu engan áhuga á að fara inn til að borða hádegismat. 

Þessa vikuna byrjuðum við að vinna með svokallað flæði eða blöndun á milli Lækjar og Lautarbarna fædd 2016. Komum við til með að bjóða þeim í leikvang þrisvar í viku eftir hvíld og í frjálsan leik á sitthvorri deildinni einu sinni í viku. Börnunum hefur verið skipt í niður, fjórir hópar eru á Læk og tveir hópar á Laut. Við erum ótrúlega spennt fyrir þessu en markmiðið er að börnin tengist innbyrgðis og að þau þrói og efli góð félagsleg tengsl við hvort annað. Frábær grunnur og aðlögun fyrir komandi flutninga á eldri gang.

Vettvangsferð og ferð í bókasafnið: Engin vettvangsferð var farinn að þessu sinni vegna slæms veðurs.

Blær vináttustundir: Byrjum að nýju í næstu viku að vinna með þetta frábæra forvarnarverkefni.

Lubbastund: Við erum búin að eiga góðar stundir með Lubba. Nú var það leitin af fimmtánda málbeininu, sem þessa vikuna var málhljóðið Gg. Við sungum vísuna, æfðum málhljóðið og tákn vikunnar. Kíktum í málbeinakassann og hlutirnir sem áttu Gg skoðaðir. 

Leikvangur með Kollu: Leikir og slökun.

Smiðja: Víkingahjálmar útbúnir vegna komandi þorrablóts Fífusala sem verður þann 24.janúar n.k. 

Hópastarf: 

Mánudagur:

• Guli hópur – spiluðu spil þar sem reyndi á þolinmæði og samvinnu. Frjáls leikur í lokin.
• Rauði hópur – við unnum með hin ýmsu stærðfræðihugtök og æfðum talnaskilningin okkar. Nýttum okkur námsefnið Numicon. En við ætlum að vera dugleg að leika okkur og læra tölurnar í gegnum þesssa frábæru stærðfræðikubba næstu mánuðunina (þetta á við alla hópanna). Frjáls leikur í lokin.
• Græni hópur – æfði fínhreyfingar, þau teiknuðu og klipptu. Í lokin spiluðu þau Lottóspil sem reyndi á einbeitingu, samvinnu og þolinmæði.

Föstudagur:

Skipulagður leikur í öllum þremur hópunum. Við lögðum áherslu á uppbyggileg samskipti, æfðum okkur í að taka tillit, skiptast á, sýna þolinmæði, umburðarlyndi og samkennd.

Takk fyrir góða viku og við sjáumst hress og kát á mánudaginn

Bestu kveðjur Inga Sif, Íris, Brynja, Lilja Rún, Nanna og Brynhildur.

DAGBÓK

20.desember 2019

Þessi dásamlega vika hefur verið ansi viðburðarrík hér á Fífusölum.

Á mánudaginn fengum við heimsókn frá Lindarkirkju, þá skemmtilegu presta Guðmund Karl og Guðna. Þeir kveiktu á aðventukransinum okkar og sungu með okkur nokkur jólalög. Einnig sagði Guðmundur Karl okkur söguna frá ferð Jósefs og Maríu til Betlehems. Við enduðum þessa góðu stund á því að syngja saman lagið “Bjart er yfir Betlehem"

Á þriðjudaginn var jólaball hjá okkur þar sem við dönsuðum í kringum fallega jólatréð okkar. Að sjálfsögðu kom jólasveinninn í heimsókn sem söng og dansaði með okkur. Einnig kíkti hann inná hverja deild og gaf börnunum jólapakka. Í hádegismat fengum við hangikjöt með öllu tilheyrandi og ís í eftirrétt.

Á miðvikudaginn kom til okkar góður gestur, leikkonan Þórdís Arnljótsdóttir. Hún lék fyrir okkur jólaleikritið “Jól í tösku” í boði foreldrafélagsins. Hún sagði okkur sögur af jólasveinunum og blessaðri móður þeirra, henni Grýlu. Börnin skemmtu sér konunglega og hlustuðu með athygli á það sem fram fór.

Síðustu tveir dagar hafa verið rólegir og höfum við einblínt á að njóta líðandi stundar í leik og starfi með börnunum okkar. 

Eftir hvíld í dag hittust starfsfólk og börn á yngri gangi til þess að kveikja á fjórða og síðasta aðventukertinu sem ber heitið Englakerti. 

Kæru foreldrar og börn, við óskum ykkur öllum gleðilegra jóla og yndislegrar samveru yfir jólahátíðina. Njótið öll sem best.

Jólakveðja Inga Sif, Íris, Sumaia, Brynhildur og Lilja Björg.

DAGBÓK

13.desember 2019

Þessi vika hefur verið ansi róleg hjá okkur vegna mikilla veikinda Lækjarbarna. Hlaupabólan kom svo sannarlega í heimsókn sem og hiti og kvefpest. Síðustu dagar hafa verið nýttir í allskyns jólastúss og notalegheit, eins hafa börnin skreytt fallega jólatréð okkar sem stendur í matsal leikskólans. Ekki hefur verið mikil útivera þessa vikuna vegna mikilla kulda, og aftakaveðurs sem var á þriðjudaginn var. En svona getur þetta verið, allra veðra von á þessum árstíma. Á þriðjudaginn var síðasti dagurinn í leikvangi fyrir jól, og áttu börnin skemmtilega stund með Kollu þar sem boðið var upp á leiki og slökun. Sem og smiðjan hjá Nönnu en þar var verið að leggja síðustu hönd á jólagjafir til foreldra og annað sem tengist jólunum. Við hlökkum mikið til komandi viku, enda margt spennandi að gerast. Við sendum öllum þeim sem enn eru veikir batakveðjur og hlökkum til að sjá alla hressa og káta í næstu viku.

Framundan:

Mánudaginn 16. desember fáum við heimsókn frá Lindakirkju kl. 9.30

Þriðjudaginn 17. desember eru litlu jólin okkar og byrjar jólaballið á yngri gangi kl.9:15 og þá dönsum við í kringum jólatréð og aldrei að vita nema jólasveinn komi í heimsókn. Svo er jólamatur í hádeginu með ís í eftirrétt.

Miðvikudaginn 18. desember býður Foreldrafélagið upp á leiksýningu en það er Leikhús í Tösku með jólasýningu fyrir okkur kl. 10.30.

Fimmtudaginn 19. desember fara jólagjafir til foreldra heim.

Takk fyrir vikuna og eigið góða helgi.

Bestu kveðjur Inga Sif, Íris, Sumaia, Brynhildur og Lilja Björg

DAGBÓK

6.desember 2019

Við erum búin að gera margt skemmtilegt þessa vikuna. Börnin hafa notið þess að vera í góðum leik með vinum sínum bæði inni og úti. Jólaundirbúningur er í fullum gangi, við föndrum, skreytum, hlustum á og syngjum jólalög. Það er dásamleg jólastemning í húsinu og við njótum þess að hafa það huggulegt saman.

Við höfum lesið mikið þessa vikuna og hlustað á margar skemmtilegar sögur í hvíldinni. Í samveru lásum við m.a. söguna um Rauðhettu og úlfinn, við nýttum okkur loðtöflu við sögulesturinn og það fannst börnunum ansi spennandi. Við höfum verið dugleg að æfa gróf- og fínhreyfingar í hinum ýmsum verkefnum, bæði í leikvangi, smiðju, í leik og útiveru. 

Í aðventustundinni okkar í dag kveiktum við á Betlehemskertinu á aðventukransinum okkar, og sungum nokkur jólalög með öllum börnunum í leikskólanum.

Vettvangsferð og ferð í bókasafnið: Nú hafa báðir hóparnir farið í bókasafnið og notið góðrar stundar með Grétu Björgu og öðrum börnum í leikskólum Kópavogs. Við ætlum að taka smá pásu og mun næsta heimsókn í bókasafnið verða fljótlega á nýju ári. Vettvangsferðir í okkar nánasta umhverfi munum við halda áfram með fram að jólum.

Blær vináttustundir – Við ræðum mikið um tilfinningar þessa dagana eins og alla aðra daga, ræðum um hvernig okkur líður, stundum verðum við sorgmædd, reið og glöð. Það að geta greint og tjáð tilfinningar sínar er forsenda þess að geta sett sig í spor annarra. 

Lubbastund: Nú var það leitin af fjórtanda málbeininu, sem þessa vikuna var málhljóðið Ll. Við sungum vísuna, æfðum málhljóðið og tákn vikunnar. Kíktum í málbeinakassann og hlutirnir sem áttu Ll skoðaðir. Nú ætlar Lubbi að fara í jólafrí og hvíla sig áður en hann og við hefjumst handa að nýju við að finna fleiri málbein.

Aðeins um hljóðkerfisvitund: Hljóðkerfisvitund er talin mikilvægur grunnur fyrir lestrarnám. Hljóðkerfisvitund felur í sér að geta greint mun á hljóðum í málinu og geta leikið sér með þau, t.d. að geta greint úr hvaða hljóðum orð eru búin til, geta tekið orð í sundur og sett þau saman aftur eða breytt þeim í eitthvað annað t.d. með rími. Á nýju ári ætlum við leggja  mikla áherslu á að efla hljóðkerfisvitund barnanna í okkar daglega starfi, samveru og í hópastarfi. 

Leikvangur með Kollu: Þrautabraut, leikir og slökun.

Smiðja: Jólagjafaundirbúningur

Hópastarf: Á mánudaginn var áttum við notalega hópastund. Allir þrír hóparnir útbjuggu fallegt jólatré sem þau skreyttu og límdu á litað blað. Í morgun máluðu þau og skreyttu í hópastarfi, fallega bjöllu, en jólabjöllurnar fara á jólatréð sem sett verður upp í næstu viku.

Framundan hjá okkur:

• Jólatréið verður sett upp í næstu viku og skreytt
• Jólaball - 17.desember n.k. verða litlu jól leikskólans haldin hátíðleg. Tímasetning kemur síðar. Það verður dansað í kringum jólatréð, jólalög sungin og jólamatur í hádeginu.
• Jólaleikrit - 18.desember n.k. jólaleikrit í boði foreldrafélagsins. Leikhús í tösku – Grýla og jólasveinarnir.
• Fimmtudaginn 2.janúar 2020 verður skipulagsdagur hjá okkur í Fífusölum. Leikskólinn verður lokaður þann dag.

Takk fyrir góða viku og við sjáumst hress og kát á mánudaginn

Bestu kveðjur Inga Sif, Íris, Sumaia, Brynhildur og Lilja Björg

DAGBÓK

29.nóvember 2019

Nú er uppáhaldstími margra að ganga í garð og við erum byrjuð á undirbúningi hátíðarinnar og allir að komast í jólaskap. Við bökuðum piparkökur með vinum okkar á Lautinni á mánudaginn var. Það var mikil jólastemning í húsinu, jólatónlist og ilmur frá nýbökuðum piparkökum úr eldhúsinu hennar Barböru. Áttum svo dásamlega stund með ykkur foreldrum í piparkökukaffinu sjálfu í gær, frábært hvað margir sáu sér fært að mæta. Takk kærlega fyrir komuna. Farið var í vettvangsferð í vikunni með hóp 1 sem skoðaði nánasta umhverfi leikskólans. Hópur 2 fór í heimsókn í bókasafn Kópavogs og hlustuðu á Grétu Björgu bókasafnafræðing segja þeim spennandi sögur. Öll börn leikskólans hittust á yngri gangi í dag og áttu notalega jólasamveru. Við kveiktum m.a. á fyrsta aðventukertinu sem heitir spádómskertið og sungum nokkur jólalög.

Blær vináttustundir – Höldum áfram með að læra að þekkja tilfinningar okkar eins og gleði, sorg og reiði og æfa okkur að hafa taumhald á þeim. Einnig æfum við okkur í að gleðjast með öðrum, bera virðingu og umhyggju fyrir öðrum. 

Lubbastund: Nú var það leitin af þrettánda málbeininu, sem þessa vikuna var málhljóðið Uu. Við fórum með vísuna, æfðum málhljóðið og tákn vikunnar. Lásum örsöguna um hana Unu sem brunaði á Gullfoss og undi sér við að safna undirfallegum jurtum í krukku.  Kíktum í málbeinakassann og hlutirnir sem áttu Uu skoðaðir gaumgæfilega. 

Hljóðkerfisvitund: Við æfum okkur hvern dag að klappa orð og nöfn í atkvæði. Við héldum áfram að lesa um Bínu bálreiðu en þessar bækur vinna að því að styrkja boðskiptahæfni og málþoska ungra barna. Hvern dag vinnum við markvisst að því að auka hugtakaskilning og orðaforða barnanna okkar.

Leikvangur með Kollu: Þrautabraut, leikir og slökun.

Smiðja: Jólagjafaundirbúningur

Hópastarf: Nú ætlum við að taka okkur smá frí frá hefðbundnu hópastarfi.Nú ætlum við bara að njóta tímans sem framundan er, hlusta á jólalög, skreyta deildina okkar, skapa fallega hluti á jólatréð sem við ætlum að dansa í kringum þann 18.desember og margt margt fleira. Mjög svo spennandi tímar framundan.

Leikurinn: er aðalnámsleið barna og er hann undirliggjandi í öllu okkar starfi hvort heldur er í daglegum athöfnum, samverustundum, málörvunarstundum, skipulögðu starfi/hópastarfi, útiveru eða vettvangsferðum. 

Takk fyrir flotta viku og megið þið eiga ánægjulega aðventu.

Sjáumst hress og kát á mánudaginn.

Bestu kveðjur Inga Sif, Íris, Sumaia, Brynhildur og Lilja Björg

DAGBÓK

22.nóvember 2019

Í þessari viku hefur verið ýmislegt brallað. Við höfum verið dugleg að fara út að leika á hverjum degi eftir síðdegishressingu. Einnig höfum við leikið mikið inni, þar sem ýmislegt var í boði, m.a. dúkkukrókur, bílakrókur, leikið með perlur, pússlað, leirað, leikið með bíla, dýr, einingakubba og margt margt fleira. Leikur og gleði alla daga.

Blær vináttustundir – Við höfum unnið með virka hlustun, við æfum okkur í að hlusta og bera virðingu fyrir þeim sem talar hverju sinni. Við munum halda áfram að æfa okkur í þessu næstu vikurnar.

Lubbastund: Nú var það leitin af tólfta málbeininu, sem þessa vikuna var málhljóðið Ee. Við fórum með vísuna, æfðum málhljóðið og tákn vikunnar. Lásum örsöguna um Ellert og Evu sem klifu upp Esjuna ásamt honum Lubba. Einnig skoðuðum við í málbeinakassann og klöppuðum í atkvæði hvern einast hlut sem þar kom uppúr. 

Hljóðkerfisvitund: Við æfðum okkur í að ríma, klappa orð og nöfn í atkvæði. Við lásum margar bækur, stoppum við orð og hugtök sem þurfa útskýringar við, sem skapar oft góðar umræður um söguna sem verið er að lesa hverju sinni. Þessa vikuna höfum við verið upptekinn af Bínu bálreiðu bókunum. Hvern dag vinnum við markvisst að því að auka hugtakaskilning og orðaforða barnanna okkar.

Leikvangur með Kollu: Þrautabraut, leikir og slökun.

Hópastarf: Við höldum áfram að vinna að skemmtilegum verkefnum sem snúa að tölum, litum, formum og bókstöfum/málhljóðum. Eins unnum við skemmtilegt verk sem börnin teiknuðu í samvinnu og búið er að fá pláss á veggnum okkar inná Læk.

 Leikurinn: er aðalnámsleið barna og er hann undirliggjandi í öllu okkar starfi hvort heldur er í daglegum athöfnum, samverustundum, málörvunarstundum, skipulögðu starfi/hópastarfi, útiveru eða vettvangsferðum. 

Viðburðið framundan:

• Mánudaginn 25.nóvember ætlar yngri gangur að baka piparkökur til að bjóða foreldrum sínum upp á í piparkökukaffinu sem verður á fimmtudaginn kemur.
• Piparkökukaffi – fimmtudaginn 28.nóvember frá kl:14:00-16:00 ætla börn leikskólans að bjóða foreldrum sínum upp á nýbakaðar piparkökur og kakó. Hlökkum til að sjá sem flesta.
• Jólaball - 17.desember n.k. Nánari upplýsingar koma síðar.
• Jólaleikrit 18.desember - Jól í tösku  í boði foreldrafélagsins. Nánari upplýsingar koma síðar.

Takk fyrir góða viku og við sjáumst hress og kát á mánudaginn

Bestu kveðjur Inga Sif, Íris, Sumaia, Brynhildur og Lilja Björg.

DAGBÓK

15.nóvember 2019

Flott vika að baki sem við enduðum með stæl, hápunkturinn var 18 ára afmælisfögnuður Fífusalar ásamt því að fagna degi íslenskrar tungu. Við fengum í heimsókn Wally trúð í boði foreldrafélagsins, hann lék fyrir okkur ævintýralegar kúnstir og vakti mikla lukku hjá börnunum. Ball furðuföt/búningar, pizza og súkkulaðikaka, hvað er hægt að biðja um meira, þvílíkur draumadagur. Síðast en ekki síst héldum við uppá afmæli Lubba sem verður 10 ára á morgun 16.nóvember.

Blær vináttustundir – áttum góða samveru í vikunni með Blæ. Við minntum börnin á mikilvægi þess að vera góður vinur og passa upp á hvort annað.

Lubbastund: Nú var það leitin af ellefta málbeininu, málhljóðið Hh. Við fórum með vísuna og tákn vikunnar. Lásum söguna um haförnin sem stóð á stóru hamrabelti og hafði nælt sér í humar. Einnig skoðuðum við í málbeinakassann sem er alltaf jafn spennandi. 

Hljóðkerfisvitund: Við æfðum okkur í að ríma, klappa orð og nöfn í atkvæði. Vorum mjög dugleg að lesa bækur í litlum hópum, áttum gott spjall um innihald bókanna og útskýrðum erfið orð.

Leikvangur með Kollu: Leikir og slökun.

Vettvangsferð: Fórum í Salaskóla og skemmtum okkur konunglega í leiktækjunum þar á bæ.

Smiðja með Nönnu: Jólaundirbúningur.

Hópastarf: Á mánudaginn buðum við börnunum upp á flæði/leik á milli Lautar/Lindar og Lækjar. Það tók þau smá tíma að koma sér í gang og finna til öryggis, en þegar það var komið áttu þau frábæran leik með nýjum vinum. Þegar fram líða stundir munum við vinna markvisst með flæði á milli Lækjar og Lautar. Einnig höfum notið þess að vinna að hinum ýmsum verkefnum sem snúa að tölum, litum, formum og málhljóðum, við klöppum hin ýmsu orð í atkvæði, við rímum og margt fleira.  

Útivera: Við höfum verið mjög dugleg að vera úti þessa vikuna. Ansi kalt hefur verið í veðri og við minnum á mikilvægi þess að börnin séu með hlý föt í fatahólfunum sínum. Eins væri fínt að hafa auka pör af vettlingum og regnvettlinga er alltaf gott að hafa.

Leikurinn: er aðalnámsleið barna og er hann undirliggjandi í öllu okkar starfi hvort heldur er í daglegum athöfnum, samverustundum, málörvun, skipulögðu starfi/hópastarfi, útiveru eða vettvangsferðum. 

Minnum á skipulagsdaginn næstkomandi fimmtudag 21.nóvember. 

Takk fyrir góða viku og við sjáumst hress og kát á mánudaginn.

Bestu kveðjur Inga Sif, Íris, Sumaia, Brynhildur og Lilja Björg.

DAGBÓK

Vikan 4.- 8.nóvember 2019

Blær vináttustundir – börnin okkar verða flinkari og flinkar með hverri vikunni að tileinka sér gildi þessa frábæra forvarnarverkefnis. Það er gaman að sjá hve fljót þau eru til að hjálpa vinum sínum ef eitthvað kemur uppá. Þá nota þau óspart orðið STOPP og láta viðkomandi vita að það sé ekki í boði að meiða eða stríða.

Lubbastund: Nú var það heimsókn á Vatnajökul, og leit af tíunda málbeininu, sem var málhljóðið J j. Við fórum með vísuna og tákn vikunnar. Lásum söguna um Jódísi sem var í jeppaferðalagi uppá jöklum Íslands. Einnig skoðuðum við í málbeinakassann sem er alltaf jafn skemmtilegt að gera. Hljóðkerfisvitund: Við héldum áfram að æfa okkur í að ríma, klappa orð og nöfn í atkvæði, einnig leikum við mikið með málhljóðin og reynum að setja nokkur saman. 

Lestrarátak Lubba: við erum mjög dugleg að lesa bækur í leikskólanum, við skrifum bókarheitið á Lubbabeinið og hengjum upp í sameiningu á Lubbafjallið okkar frammi á gangi. Þetta finnst börnunum ótrúlega skemmtilegt og spennandi. Hlökkum mikið til að sjá Lubbafjallið okkar stækka með hverjum deginum.

Leikvangur með Kollu: Þrautabraut, slökun og heilsubókarskráningar

Vettvangsferð: Fórum í góða vettvangsferð þar sem við skoðuðum breytinguna á náttúrinni. Árstíðin vetur gengin í garð og flest öll laufblöðin fallin af trjánum, sofnuð eins og rætt var í hópnum, þau vakna aftur í vor. Við sáum tvö krumma að leik við Salaskóla og sungum við þeim til heiðurs lagið “Krummi krunkar úti” Tókum okkur snöggan túr um Nettó, og sáum margt spennandi þar.

Smiðja með Nönnu: Jólaundirbúningur.

Hópastarf: Þessa vikuna höfum við lagt mikla áherslu á samvinnu meðal barna, við höfum unnið að ýmsum verkefnum s.s byggt dýragarð úr kubbum, spilað lottó, leikið með samstæðuspil, pússlað tvö og tvö saman, einnig höfum verið dugleg að leika saman í  hlutverkaleik og frjálsum leik. Einnig höfum við teiknað mikið og æft okkur í að klippa. Við höfum lesið bækur í litlum hópum, skoðað myndir og útskýrt erfið orð sem koma fram í bókunum. Við rímum og vinnum með samtöfur, leikum með tölur, form og liti.

Samvera: Við syngjum alla daga og förum í leiki. Síðustu vikur höfum við verið sérstaklega dugleg að æfa og syngja lagið "'Á íslensku má alltaf finna svar"

Leikurinn: er aðalnámsleið barna og er hann undirliggjandi í öllu okkar starfi hvort heldur er í daglegum athöfnum, samverustundum, málörvun, skipulögðu starfi/hópastarfi, útiveru eða vettvangsferðum. 

Takk fyrir góða viku og við sjáumst hress og kát á mánudaginn.

Bestu kveðjur Inga Sif, Íris, Sumaia, Brynhildur og Lilja Björg.

DAGBÓK

Vikan 21.- 26.október 2019

Í þessari viku áttum við flottan afmælisprins, og í tilefni afmælis síns bauð hann okkur í fagnað með poppi og saltstöngum. Yndis þakkir fyrir okkur elsku vinur.

Blær vináttustundir: Í vikunni hlustuðum við á tónlist sem má finna á Spotfy undir heitinu Vinátta-gott er að eiga vin, sem er mjög skemmtilegt að hlusta á. Einnig unnum við með tvö samræðuspjöld með ákveðnum aðstæðum sem geta komið upp í samskiptum á milli barna. Við fengum börnin til að tjá sig og finna góða lausn saman í þessum ákveðnum aðstæðum. Hér æfum við okkur í að hlusta á hvert annað og sýna hvort öðru virðingu. Flott forvarnarverkefni gegn einelti, en markmiðið er að kenna þeim góð samskipti, virðingu og hugrekki þannig að þau geti sjálf staðið upp fyrir þeim sem lendir einelti og aðstoðað. Vinátta er mikilvæg, það vilja allir eiga vini og engin vill vera skilinn útundan.

Lubbastund: Við leituðum að áttunda málbeininu, nú var það málhljóðið Ú ú. Fórum með vísuna og tákn vikunnar. Einnig skoðuðum við í málbeinakassann sem er alltaf jafn skemmtilegt að gera. Hljóðkerfisvitund: Við æfðum okkur í að klappa í atkvæði, allskonar orð og nöfnin okkar. Við byrjuðum að æfa okkur í að ríma, svolítið skrítið sögðu börnin, en spennandi. Við höfum sungið, farið í leiki og lesið mikið. Við lásum t.d. söguna um Búkollu, og Inga Sif hefur sagt börnunum sögur af honum Emil í Kattholti.

Leikvangur: Þrautabraut og heilsubókarskráningar

Vettvangsferð: Fórum í góða gönguferð kringum Salaskóla. Stoppuðum oft á leiðinni til að skoða og rannsaka og upplifa umhverfið okkar. Sáum mikið af formum og tölum á leiðinni. 

Smiðja: Unnum skemmtilegar myndir með túss og vatnslitum. 

Hópastarf: Lékum okkur með form, liti, tölur. Æfðum okkur í að spora tölustafi og form. Æfðum okkur í að ríma og klappa orð í atkvæði. Unnum  með líkamann okkar – líkamsheiti og skynfærin. Við æfum okkur á hverjum degi í að læra að vinna saman sem hópur og gengur það ótrúlega vel. Við leggjum mikla áherslu á uppbyggjandi og jákvæð samskipti, þar sem virðing og traust er í fyrirrúmi.

Leikurinn: er aðalnámsleið barna og er hann undirliggjandi í öllu okkar starfi  hvort heldur er í daglegum athöfnum, samverustundum, málörvun, skipulögðu starfi/hópastarfi, útiveru eða vettvangsferðum. Það er svo gaman að vera saman.

Takk fyrir góða viku og við sjáumst hress og kát á mánudaginn.

Bestu kveðjur Inga Sif, Íris, Sumaia og Brynhildur.

DAGBÓK

Vikan 14.-18.október 2019

Góð vika að baki með gullmolunum ykkar. Við höfum verið dugleg að vinna með vináttu og jákvæð samskipti. Við vinnum hvern dag með málörvun, leggjum inn ný orð og hugtök, leikum okkur mikið, förum í hópastarf, samveru, smiðju, leikvang og margt fleira.

Málörvun - Lubbi finnur málbein. Nú var Lubbi á Ísafirði að leita eftir sjöunda málbeininu með málhljóðinu Íí – Ýý. Við skoðuðum í málbeinakassann og eru börnin alltaf mjög spennt fyrir því. Hljóðkefisvitund: Við erum búin að vera dugleg að klappa atkvæði í nöfnunum okkar. Í næstu viku ætlum við að byrja að æfa okkur að ríma, það verður spennandi.

Blær vináttuverkefnið – við spjöllum saman hvern dag um hvernig við getum orðið betri vinir, við æfum okkur að hjálpa hvert öðru og vera góð hvert við annað. Einnig æfum við okkur að hlusta og fara eftir fyrirmælum. Við vinnum með tilfinningaspjöld og fáum þau til að tjá sig.

Leikvangur: Þrautabraut og heilsubókarskráningar. 

Vettvangsferð: Fórum í góðan göngutúr um nærumhverfi skólans. Að þessu sinni fékk Lubbi að koma með okkur í ferðina. Við settumst niður við rólóvellinn við Blásali og áttum frábæra Lubbastund, lásum örsöguna í bókinni og æfðum okkur að segja Íííí. 

Smiðja: Saumuðu í verkefnið sem þau klipptu í síðustu viku.  Þeim gekk vel að sauma, þau áttu að einbeita sér að því að fara til skiptis upp og niður með nálina. Góð æfing fyrir fínhreyfingar og einbeitinguna.

Hópastarf: Börnin fengu að lita verkefni tengt líkamanum. Við klöppuðum nöfnin okkar í atkvæði og æfðum okkur í litunum.

Takk fyrir góða viku og við sjáumst hress og kát á mánudaginn.

Bestu kveðjur Inga Sif, Íris, Sumaia, Brynhildur og Lilja Björg

DAGBÓK

Vikan 7.-11.október 2019

Á mánudaginn áttum við vinastund með Blæ bangsa. Eins og alltaf vinnum með grunngildin sem verkefnið byggir á; umburðarlyndi, virðingu, umhuggju og hugrekki. Þennan daginn skoðuðum við mynd sem sýnir börn við vissar aðstæður. Við ræddum saman um hvað var að gerast á spjöldunum, við skoðuðum svipbrigði barnanna á þeim og hvaða tilfinningar lágu að baki. Við erum mjög upptekinn að eiga í góðum samskiptum við vini okkar, við erum að læra að sýna hvort öðru samkennd, hlusta og taka tillit. Eftir samveru fórum við út í góða veðrið. Lubbi kom í heimsókn fyrir hádegismat og leituðum við saman eftir málhljóðinu Dd, við kíktum í Dd kassann og fundum orð og nöfn sem byrja á Dd. Eftir hádegismat, hvíld og góðan leik enduðum við daginn á útiveru. 

Á þriðjudaginn fóru hóparnir í leikvang til Kollu og áttu góða hreyfistund. Eftir leikvang fór guli hópur út í góða veðrið. Rauði og græni hópur var inni og lék sér í hlutverkaleik, einnig hjálpuðu þau til við að leggja á borð og leggja dýnur á sinn stað fyrir hvíldina. Samvera fyrir hádegismat með Lubba og málhljóðið fundið að nýju. Eftir hádegismat, hvíld, leik með bíla, lestina, leir og pússl, samveru og síðdegishressingu var farið út að nýju.

Á miðvikudaginn fórum við með seinni hópinn í bókasafnið og náttúrufræðisafnið. Við skoðuðum fiska, fugla, krabba og fleira. Enduðum svo í sögustund með Grétu Björg, frábær ferð. Eftir hádegismat og hvíld var púslað, leirað og leikið með kubba. Lubbi kíkti í heimsókn fyrir síðdegishressingu, málhljóðið fundið, fórum með vísuna og lesin sagan um Lubba. Einnig forum við í skemmtilegan leik með hópnum “í grænni lautu”. Enduðum svo daginn á útiveru.

Á fimmtudaginn áttum við vinastund með Blæ bangsa, við héldum áfram að spjalla um tilfinningar og vináttu okkar á milli. Áttum góðan smiðjudag og leik inná deild. Lubbi heimsótti okkur, við fundum og æfðum málhljóðið Dd og sungum og trölluðum. Eftir hádegismat, hvíld, góðan leik og síðdegishressingu var farið út að nýju að leika. 

Smiðja - Nanna

Á fimmtudaginn gerðu þau tvö verkefni. Þau áttu að teikna karl á langt blað og síðan klæða hann í föt. Fötin voru efnisbútar sem þau límdu á og hárið var í flestum tilfellum garn, sumir voru þó með húfu. Hitt verkefnið er hluti af stærra verkefni, en í því strikuðu þau með blýanti eftir formi. Fylgdist með að þau héldu rétt á blýanti, þau voru misfær í að elta útlínur formsins sem þau strikuðu eftir. Síðan klipptu þau út formið, flest héldu rangt á skærunum og gerðum við því þetta saman til að leiðrétta haldið. Um leið og þau beittu sér rétt þá prófaði ég að sleppa takinu. Höldum áfram að æfa okkur í þessu. 

Í dag föstudag byrjuðum við daginn á að pússla, leika með bíla og skoða bækur. Eftir morgunmat og ávexti var farið út með allan Lækjarhópinn. Fyrir hádegismat áttum við góðan afmælisfagnað með einum prinsinum okkar, hann fékk kórónu og afmælissöng. Afmælisprinsinn bauð okkur uppá popp og saltstangir. Hipp hipp hurra fyrir honum. Eftir hádegismat, hvíld, frjálsan leik, samveru með Lubba og síðdegishressingu enduðum við daginn á útiveru.

Takk fyrir góða viku og við sjáumst hress og kát á mánudaginn.

Bestu kveðjur Inga Sif, Íris, Sumaia, Brynhildur og Lilja Björg.

DAGBÓK

Kæru foreldrar

Dagarnir eru fljótir að líða þegar það er gaman og þessi vika hefur aldeilis flogið áfram.

Við höfum brallað margt skemmtilegt þessa vikuna. Inni höfum við leikið mikið, við höfum t.d. pússlað, kubbað, leirað, perlað, spilað, hlustað á sögur og skoðað bækur, við höfum leikið í hlutverkaleik, frjálsum leik og haft mikið gaman að vera saman. Einnig höfum verið úti þessa vikuna og dundað okkur í góðum leik með félögunum.

Leikvangur/þriðjudagur: Þrautabraut, heilsubókarskráning og slökun.

Vettvangsferð og bókasafnaferð/miðvikudagur: Hópur 1 tóku sér góðan göngurúnt um nánasta umhverfi skólans, enduðu á róló þar sem þau fengu að hlaupa um og leika. Hópur 2 fór í bókasafn Kópavogs, þar áttum við góða sögustund með Grétu Björg. Ekki má gleyma að við skoðuðum Náttúrugripasafnið sem er i sömu byggingu og sló sú skoðunarferð heldur betur í gegn hjá hópnum.

Smiðja fimmtudag: Börnin bjuggu til lukt úr pappamassa og laufblöðum, ótrúlega spennandi.

Hópastarf: Guli hópur æfði sig í að klippa með skærum. Rauði hópur æfði sig í tölum frá 1-5, við notuðum við kennsluna stærðfræðikubbana Numicon. Græni hópur var í byggingaleik með holukubbum sem er skemmtilegur og spennandi efniviður.

Lubbi kom í heimsókn alla vikuna og við fundum með honum málhljóðið Nn.

Blær bangsi kom í heimsókn á mánudaginn og áttum við gott spjall um vináttu.

Takk fyrir góða viku og eigið góða helgi.

Bestu kveðjur, Inga Sif, Íris, Sumaia, Brynhildur og Lilja Björg.