Sími 441 5200

Daglegt starf

Daglegt starf

Allt starf leikskólans felur í sér viðamikið og samþætt nám, hvort sem það eru daglegar venjur, svo sem matartímar og klósettferðir, eða markvisst starf skipulagt af kennurum. Börn uppgötva og læra af öllu sem þau taka sér fyrir hendur bæði í leik sem og daglegu starf inni og úti, með stuðningi og hvatningu hinna fullorðnu og í samvinnu við önnur börn.

Samkvæmt Aðalnámskrá leikskóla (2011) eru námssvið leikskóla þessi:
Læsi og samskipti
Heilbrigði og vellíðan
Sjálfbærni og vísindi
Sköpun og menning

Daglegt starf mótast af þessum námssviðum, en í hverri stund dagsins tvinnast saman mörg námssvið í heilstætt nám. Á hverjum degi er lagt upp úr að börnin hafi góðan tíma fyrir frjálsan leik, bæði inni og úti. Öll börn fara í hverri viku í tíma í tónlist, myndlist/sköpun og íþróttum. Þessa tíma eru þau í litlum hópum undir faglegri handleiðslu. Að auki fara börnin reglulega í vettvangsferðir um hverfið, en nærumhverfi leikskólans býður upp á ótal skemmtilegar gönguleiðir um öruggt göngustígakerfi. Börnin í Gili (eldri deildir) fara í sund í Salalaug, en leikskólinn á tíma þar tvisvar í  viku. Um það bil níu börn fara saman með þremur kennurum og er lagt upp úr að hafa þetta gæðastundir.

Fífusalir á aðgang að, ásamt Salaskóla og leikskólanum Rjúpnahæð, útinámssvæðinu Rjúpnalundi sem er í hlíðum Rjúpnahæðar. Við eigum svæðið á miðvikudögum og erum dugleg að fara þangað í litlum hópum, kveikjum upp eld og rannsökum náttúruna og umhverfið.